घनकचरा व्यवस्थापन विभागातील कायमस्वरूपी गैरहजर असलेल्या कर्मचाऱ्यांवर कठोर कारवाई करा

अतिरिक्त महानगरपालिका आयुक्त (शहर) डॉ. (श्रीमती) अश्विनी जोशी यांचे निर्देश

घनकचरा व्यवस्थापनासंदर्भात शहर विभागातील सर्व प्रशासकीय विभागांच्या कामगिरीचा घेतला आढावा

स्वच्छता ही केवळ एखाद्या विशिष्ट अभियानापुरती मर्यादित न ठेवता नियमित आणि जबाबदारीने स्वच्छता राखण्यासाठी घनकचरा व्यवस्थापन विभागातील कर्मचारी आणि अधिकाऱ्यांनी सक्रियपणे कार्य करावे. तथापि, घनकचरा व्यवस्थापन विभागातील प्रत्यक्ष दैनंदिन स्वच्छता करण्यासाठी नेमलेले मात्र कायमस्वरूपी गैरहजर असलेल्या स्वच्छता कर्मचाऱ्यांवर कारवाई करावी, असे निर्देश अतिरिक्त महानगरपालिका आयुक्त (शहर) डॉ. (श्रीमती) अश्विनी जोशी यांनी दिले आहेत.

घनकचरा व्यवस्थापनासंदर्भात शहर विभागातील सर्व प्रशासकीय विभागांच्या कामगिरीचा डॉ. जोशी यांनी एफ (दक्षिण) विभाग कार्यालयात आयोजित बैठकीत आज (दिनांक १० जून २०२५) आढावा घेतला. त्यावेळी त्यांनी हे निर्देश दिले.

उपायुक्त (परिमंडळ-१) डॉ. (श्रीमती) संगीता हसनाळे, उपायुक्त (परिमंडळ-२) श्री. प्रशांत सपकाळे, उपायुक्त (घनकचरा व्यवस्थापन) श्री. किरण दिघावकर, शहर विभागातील सर्व प्रशासकीय विभागांचे (वॉर्ड) सहायक आयुक्त तसेच घनकचरा व्यवस्थापन विभागाचे अधिकारी, कर्मचारी यावेळी उपस्थित होते.

आढावा घेतल्यानंतर अतिरिक्त महानगरपालिका आयुक्त (शहर) डॉ. (श्रीमती) अश्विनी जोशी म्हणाल्या, स्वच्छतेसंदर्भात आयोजित एखाद्या अभियानात मोठ्या प्रमाणात कचरा संकलित होत असेल तर नियमितपणे देखील तितक्याच कचऱ्याचे संकलन व्हायला हवे. स्वच्छतेसंदर्भातील अभियानाने प्रोत्साहन मिळत असले तरी नागरिकांमध्ये स्वच्छतेविषयी जागरुकता निर्माण होणेही तितकेच महत्वाचे आहे. घनकचरा व्यवस्थापन विभागात कार्यरत असलेले स्वच्छता कर्मचारी नियमितपणे त्यांची जबाबदारी पार पाडत असल्याची खात्री संबंधित अधिकाऱ्यांनी करावी. तथापि, ४५ दिवसांपेक्षा अधिक कालावधीपासून एखादा कर्मचारी कायमस्वरुपी गैरहजर असल्यास त्याच्यावर कठोर कारवाई करावी. सहायक मुख्य पर्यवेक्षक, कनिष्ठ अभियंता आदींनी ‘सचेत’ अॅपचा नियमितपणे वापर करावा. तसेच, संबंधित प्रशासकीय विभागाच्या सहायक आयुक्त यांनी आपापल्या भागातील घनकचराविषयक गरजा, मोठ्या प्रमाणात कचरा निर्माण होणारी ठिकाणे आणि नागरिकांच्या वर्दळीच्या वेळा लक्षात घेऊन आवश्यकतेनुसार नियोजनासाठी सूक्ष्म आराखडा सादर करावा, असे निर्देशही डॉ. अश्विनी जोशी यांनी यावेळी दिले.

प्रत्यक्ष कार्यक्षेत्रावर (on field) कार्यरत असलेले सहायक मुख्य पर्यवेक्षक, कनिष्ठ अभियंता यांनी त्यांच्या अधिकारक्षेत्रातील परिसरात नियमितपणे परिक्षण करावे. तसेच, कुठेही कचरा आढळणार नाही, याची काळजी घ्यावी, अशी सूचना उपायुक्त (घनकचरा व्यवस्थापन) श्री. किरण दिघावकर यांनी केली.