प्रियांका गांधी – वाड्रा यांना केरळ उच्च न्यायालयाचा समन्स

नवी दिल्ली: नोव्हेंबर २०२४ च्या पोटनिवडणुकीत वायनाड लोकसभा मतदारसंघातून प्रियांका गांधी - वाड्रा यांच्या विजयाला आव्हान देणाऱ्या भाजप नेत्या नव्या हरिदास यांनी दाखल केलेल्या याचिकेवर केरळ उच्च न्यायालयाने मंगळवारी काँग्रेस नेत्या प्रियांका गांधी - वाड्रा यांना समन्स बजावले आहे.

हरिदास यांच्या वकिलाचा युक्तिवाद ऐकल्यानंतर न्यायमूर्ती के. बाबू यांनी याचिका स्वीकारली. यावेळी न्यायालयाने प्रियांका गांधी - वाड्रा यांना समन्स बजावण्याचे निर्देश दिले. या प्रकरणाची पुढील सुनावणी ऑगस्टमध्ये होणार आहे.

१३ नोव्हेंबर रोजी वायनाड येथून भाजप उमेदवार म्हणून हरिदास यांनी पोटनिवडणूक लढवली होती. मात्र, या निवडणुकीत त्या तिसऱ्या क्रमांकावर राहिल्या. हरिदास यांनी त्यांच्या याचिकेत आरोप केला आहे की गांधी यांनी त्यांच्या आणि त्यांचे पती रॉबर्ट वाड्रा यांच्या मालकीच्या अनेक स्थावर मालमत्तेची तसेच वाड्रा यांच्या नावावर असलेल्या विविध गुंतवणूक आणि जंगम मालमत्तेची माहिती उघड केली नाही. हरिदास यांच्या मते, याद्वारे लोकप्रतिनिधी कायदा, १९५१ अंतर्गत अनिवार्य प्रकटीकरण तरतुदींचे उल्लंघन होते. त्याचप्रमाणे की गांधींनी अशा दडपशाहीद्वारे मतदारांची दिशाभूल केली. त्यामुळे त्यांची निवडणूक रद्द करण्याचे आदेश देण्याची विनंती करणारी याचिका हरिदास यांनी उच्च न्यायालयात दाखल केली आहे.