‘वाडा चिरेबंदी’ला अमेरिकेतही उत्स्फूर्त दाद

अमेरिकेतील मराठी प्रेक्षकांनी ’वाडा चिरेबंदी’ या अभिजात नाटकाचे भरभरून स्वागत करत त्याला उत्स्फूर्त प्रतिसाद दिला आहे. दिग्दर्शक चंद्रकांत कुलकर्णी आणि लेखक महेश एलकुंचवार यांच्या नावावर शिक्कामोर्तब असलेल्या या नाटकाचा अमेरिका दौरा सध्या जोरात सुरू असून, या दौर्‍यातील प्रत्येक प्रयोगाला हाऊसफुल्ल प्रतिसाद मिळत आहे. बदलत्या सामाजिक आणि कौटुंबिक मूल्यांवर भाष्य करणारे हे नाटक आजही प्रेक्षकांच्या हृदयाशी थेट संवाद साधत असल्याचे यामुळे स्पष्ट होते.

‘वाडा चिरेबंदी’ हा एक नाट्यप्रवास आहे, जो एका ब्राह्मण कुटुंबाच्या पिढ्यान्पिढ्यांच्या बदलत्या नातेसंबंधांची, संघर्षाची आणि अस्तित्वाच्या शोधाची गोष्ट सांगतो. एके काळचा रूढ आणि सांपत्तिकदृष्ट्या संपन्न असलेला वाडा आता ओस पडू लागलेला, तुटलेल्या नात्यांचा साक्षीदार होतो. नाटकातील प्रत्येक पात्र ही त्या काळाची, विचारांची आणि सामाजिक प्रवाहाची एक खूण ठरते. निवेदिता सराफ, पौर्णिमा मनोहर, प्रतिमा जोशी, राजश्री गढीकर, धनंजय सरदेशपांडे, विनिता शिंदे, अजिंक्य ननावरे, सिमरन सैद, वैभव मांगले आणि प्रसाद ओक या सर्व कलाकारांनी त्यांच्या सशक्त अभिनयाने नाटकाच्या प्रत्येक प्रसंगाला जिवंत केलं आहे.

अनेक वर्षांनंतर पुन्हा एकदा ’वाडा चिरेबंदी’ रंगभूमीवर येणं आणि त्याचे प्रयोग अमेरिकेत होणं, ही नाट्यप्रेमींसाठी पर्वणीच आहे, असं मत प्रेक्षकांनी व्यक्त केलं आहे.

‘राठी सेलिब्रिटी लीग’चा झंझावाती थरार सुरू होणार! - रुबाब महाराष्ट्राचा

मराठी मातीतील तेज, मराठ्यांच्या पराक्रमाची झलक, आणि सेलिब्रिटींची रंगतदार मैफील, हे सगळं एका मंचावर अनुभवायला मिळणार आहे ‘मराठी सेलिब्रिटी लीग’च्या आगामी पर्वात! ‘रुबाब महाराष्ट्राचा’ या टॅगलाईनसह येणार्‍या या पर्वाची घोषणा एक झंझावात घेऊन आली आहे. नाट्यमय भाषेत सादर झालेल्या घोषणापत्रात ज्या उत्साहाने, जोशाने आणि गर्जनेने या स्पर्धेचा नवा अध्याय सुरू होणार आहे. या लीगमध्ये सहभागी होणार्‍या संघांमध्ये मराठी मनोरंजनविश्वातील आघाडीचे कलाकार सहभागी होणार असून, त्यांनी मैदानात उतरताना केवळ त्यांच्या अभिनयाचीच नाही, तर त्यांच्या क्रीडाशक्तीचीही झलक दाखवण्याचं ठरवले आहे. तारे-तारकांच्या उपस्थितीमुळे ही केवळ एक स्पर्धा न राहता, ती एक भव्य उत्सवात रुपांतर होणार आहे.

स्पर्धेच्या स्वरूपात विविध संघ एकमेकांशी भिडणार असून प्रत्येक संघात मराठी सिनेसृष्टी, टेलिव्हिजन, रंगभूमी आणि डिजिटल माध्यमातील प्रसिद्ध चेहरे असतील. मराठ्यांचे वॉरियर्स, शिलेदार, स्टार मराठा यांसारख्या संघनावांनीच युद्धभूमीवरच्या रंगतदार संघर्षाची चाहूल लागते आहे.