न्या. वर्मा नोटकांड – समितीचा अहवाल सरन्यायाधीशांना सादर
Total Views |
नवी दिल्ली, न्यायमूर्ती यशवंत वर्मा यांच्यावरील नोटकांडाच्या आरोपांची चौकशी करण्यासाठी सरन्यायाधीश संजीव खन्ना यांनी स्थापन केलेल्या अंतर्गत समितीने आपला अहवाल सर्वोच्च न्यायालयात सादर केला आहे.
सर्वोच्च न्यायालयाने जारी केलेल्या निवेदनानुसार, समितीने ४ मे रोजी सरन्यायाधीश खन्ना यांना आपला अहवाल सादर केला. पंजाब आणि हरियाणा उच्च न्यायालयाचे मुख्य न्यायाधीश शील नागू, हिमाचल उच्च न्यायालयाचे मुख्य न्यायाधीश जीएस संधावालिया आणि कर्नाटक उच्च न्यायालयाच्या न्यायमूर्ती अनु शिवरामन यांचा समावेश असलेल्या समितीने न्यायमूर्ती वर्मा यांच्या निवासस्थानी रोख रकमेच्या वसुलीच्या आरोपांची चौकशी केली होती. त्यांनी २५ मार्च रोजी तपास सुरू केला आणि ३ मे रोजी अहवाल अंतिम केला. त्यानंतर तो ४ मे रोजी सरन्यायाधीशांसमोर ठेवण्यात आला.
१४ मार्च रोजी संध्याकाळी न्यायमूर्ती वर्मा यांच्या घरी आग लागल्यानंतर अग्निशमन दलाच्या जवानांनी बेहिशेबी रोकड जप्त केली होती. त्यावेळी न्यायमूर्ती वर्मा आणि त्यांच्या पत्नी दिल्लीत नव्हते आणि मध्य प्रदेशात प्रवास करत होते. आग लागली तेव्हा घरी फक्त त्याची मुलगी आणि वृद्ध आई होती. नंतर एक व्हिडिओ समोर आला ज्यामध्ये आगीत रोख रकमेची बंडले जळताना दिसली होती. त्यानंतर वर्मा यांच्यावर भ्रष्टाचाराचे आरोप झाले होते.