छत्रपती शिवरायांचा गौरवशाली वारसा सांगणारी सहल

मुंबई, भारतीय रेल्वे पहिल्यांदाच 'छत्रपती शिवाजी महाराज सर्किट'वर वारसा सहलीचे आयोजन करणार आहे. या दौऱ्यात छत्रपती शिवाजी महाराजांच्या जीवनाशी संबंधित महत्त्वाची ठिकाणे दाखविली जातील. ही भारत गौरव ट्रेन छत्रपती शिवाजी महाराज टर्मिनस (सीएसएमटी) येथून प्रवास सुरू करेल.

'छत्रपती शिवाजी महाराज सर्किट टूर' साठी बहुप्रतिक्षित रेल्वे प्रवास ०९ जून २०२५ रोजी सुरु होईल. ५ रात्री आणि ६ दिवसांचा हा प्रवास छत्रपती शिवाजी महाराज टर्मिनस स्टेशनपासून सुरू होईल. अत्याधुनिक भारत गौरव एसी टुरिस्ट ट्रेनमध्ये स्लीपर, सेकंड एसी आणि थर्ड एसी कोचसह एकूण ७४८ पर्यटकांना सामावून घेण्याची क्षमता आहे. पर्यटक दादर आणि ठाणे रेल्वे स्थानकांवरूनही या पर्यटन ट्रेनमध्ये चढू शकतात. या वारसा प्रवासाची तिकिटे आयआरसीटीसी वेबसाइटवरून बुक करता येतील जी ऑनलाइन उपलब्ध आहे आणि प्रथम येणाऱ्यास प्राधान्य या तत्त्वावर उपलब्ध आहे. ही सहल भारतीय रेल्वेच्या पर्यटन आणि खानपान महामंडळाद्वारे आयोजित केली जात आहे. त्यात हॉटेलमध्ये राहण्याची व्यवस्था, शाकाहारी जेवण, बसने पर्यटन, प्रवास विमा आणि टूर एस्कॉर्ट इत्यादी सुविधा उपलब्ध असतील.

छत्रपती शिवाजी महाराज टर्मिनसवरून निघालेली ट्रेन कोकण रेल्वे मार्गावर माणगाव रेल्वे स्थानकावर पोहोचेल. माणगाव हे रायगड किल्ल्यापासून सर्वात जवळचे रेल्वे स्थानक आहे. रायगड हे तेच ऐतिहासिक ठिकाण आहे जिथे शिवाजी महाराजांचा राज्याभिषेक झाला होता आणि नंतर ते त्यांची राजधानी देखील बनले. रायगड किल्ल्याला भेट दिल्यानंतर, पर्यटक ट्रेनने परत येतील आणि पुण्याला रवाना होतील, जिथे रात्रीचे जेवण आणि हॉटेलमध्ये रात्रीचा मुक्काम यांची व्यवस्था केली जाईल.

दौऱ्याच्या दुसऱ्या दिवशी, पर्यटकांना पुण्यातील प्रमुख पर्यटन स्थळे जसे की, लाल महाल, कसबा गणपती आणि शिवसृष्टी दाखवली जाईल. १६३० मध्ये शहाजी भोंसले यांनी त्यांची पत्नी जिजाबाई आणि मुलगा शिवाजी यांच्यासाठी लाल महाल बांधला होता. सध्याच्या वास्तूचे नूतनीकरण १९८४ मध्ये करण्यात आले आणि त्यात छत्रपती शिवाजी महाराजांच्या जीवनाचे वर्णन करणाऱ्या तैलचित्रांची एक मोठी मालिका लावण्यात आली आहे. पुण्याचे ग्रामदेवता म्हणून प्रसिद्ध असलेले कसबा गणपती मंदिर १८९३ मध्ये स्थापन झाले. येथून पर्यटक छत्रपती शिवाजी महाराजांच्या जीवनावर आधारित भारतातील सर्वात मोठे थीम पार्क असलेल्या शिवसृष्टीला जातील. येथे पर्यटकांना शिवाजी महाराजांचे जीवनदर्शन थ्रीडी आणि इतर संवादात्मक सत्रांमध्ये अनुभवता येईल.

पुण्यात रात्रीच्या मुक्कामानंतर, सहलीच्या तिसऱ्या दिवशी पर्यटक पुण्यापासून सुमारे ९५ किमी अंतरावर असलेल्या शिवनेरी किल्ल्याला भेट देतील, जो जुन्नर शहराजवळील एका टेकडीवर आहे. हे छत्रपती शिवाजी महाराजांचे जन्मस्थान आहे आणि मुस्लिम राजवटीविरुद्ध मराठ्यांच्या अभिमानाचे प्रतीक आहे. त्याच दिवशी दुपारच्या जेवणानंतर, पर्यटक १२ ज्योतिर्लिंगांपैकी एक असलेल्या भीमाशंकर ज्योतिर्लिंग मंदिराला भेट देतील. यानंतर पर्यटक रात्रीच्या विश्रांतीसाठी पुण्यात परततील.

चौथा दिवस

चौथ्या दिवस

पर्यटक भारत गौरव ट्रेनने सातारा येथे रवाना होतील आणि प्रतापगड किल्ल्याला भेट देतील. हा तोच ऐतिहासिक किल्ला आहे जिथे १६५९ मध्ये अफझल खान आणि छत्रपती शिवाजी महाराज यांच्यातील युद्ध झाले होते. दुपारच्या जेवणानंतर ट्रेन तिच्या अंतिम गंतव्यस्थान कोल्हापूरकडे रवाना होईल.

पाचव्या दिवशी सकाळी ही ट्रेन छत्रपती शाहू महाराज टर्मिनस, कोल्हापूर रेल्वे स्टेशनवर पोहोचेल. येथे हॉटेलमध्ये नाश्ता आणि तयारी केल्यानंतर, पर्यटक महालक्ष्मी मंदिर (अंबाबाई) आणि नंतर पन्हाळा किल्ल्यावर जातील. सह्याद्री पर्वतरांगांवर वसलेला हा किल्ला अनेक ऐतिहासिक युद्धांचा साक्षीदार आहे. शिवाजी महाराजांचे सेनापती बाजी प्रभू देशपांडे यांच्या शौर्यासाठीही हे ठिकाण स्मरणात आहे. येथून ट्रेन संध्याकाळी उशिरा मुंबईला परतीच्या प्रवासासाठी निघेल आणि सहाव्या दिवशी सकाळी मुंबईला पोहोचेल.