दहशतवाद्यांविरोधात लढताना वीरमरण! शहीद जवान संदीप गायकर अनंतात विलीन, लष्करी इतमामात अंत्यसंस्कार

अकोला : जम्मू-काश्मीरमधील किश्तवाड जिल्ह्यात दहशतवाद्यांशी झालेल्या चकमकीत महाराष्ट्रातील जवान संदीप पांडुरंग गायकर शहीद झाले. त्यांचे पार्थिव अकोले तालुक्यातील ब्राम्हणवाडा गावात आणण्यात आले. गावात दोन दिवसांचा बंद पाळण्यात आला. गावातील सह्याद्री विद्यालयाच्या मैदानात त्यांच्यावर अंत्यसंस्कार करण्यात आले.

संदीप गायकर हे मराठा लाइट इन्फंट्रीमध्ये कार्यरत होते. दहशतवाद्यांशी लढताना त्यांनी प्राणांची आहुती दिली. त्यांच्या निधनाने गावात शोककळा पसरली आहे. संदीप यांच्या मागे पत्नी, दीड वर्षांचा मुलगा आणि आई-वडील असा परिवार आहे.

गावकऱ्यांनी त्यांच्या बलिदानाला सलाम केला. त्यांच्या शौर्याची आठवण कायम राहील, असे ग्रामस्थांनी सांगितले. संदीप यांच्या अंत्यसंस्काराला लष्करी अधिकारी, स्थानिक प्रशासन आणि अनेक नागरिक उपस्थित होते. संदीप गायकरांना संपूर्ण देशातून श्रद्धांजली वाहण्यात येत आहे.