यूको बँकेत सहा हजार 200 कोटींचा गैरव्यवहार

 

 

 

नवी दिल्ली : ( ED arrested former Chairman and Managing Director of UCO Bank, Subodh Kumar Goyal ) अंमलबजावणी संचालनालयाने (ईडी) यूको बँकेचे माजी अध्यक्ष तथा व्यवस्थापकीय संचालक सुबोध कुमार गोयल यांना नवी दिल्ली येथील त्यांच्या निवासस्थानावरून अटक केली आहे. बँक फसवणूक प्रकरणात ‘कॉनकास्ट स्टील अ‍ॅण्ड पॉवर लिमिटेड’सह इतरांविरुद्ध सुरू असलेल्या चौकशीसंदर्भात ही कारवाई करण्यात आली आहे.

 

‘ईडी’च्या कोलकाता विभागीय कार्यालयाने दि. 16 मे रोजी ‘मनी लॉण्ड्रिंग प्रतिबंधक कायदा (पीएमएलए), 2002’च्या तरतुदींनुसार सुबोधला अटक केली. मीडिया रिपोर्ट्सनुसार, सुबोध गोयल यांना दि. 17 मे रोजी कोलकाता येथील विशेष ‘पीएमएलए’ न्यायालयात हजर करण्यात आले, न्यायालयाने दि. 21 मे रोजीपर्यंत ‘ईडी’ कोठडी सुनावली आहे.

 

गोयल यांच्यावर 6,210.72 कोटी रुपयांच्या कर्जाच्या रकमेचा गैरवापर केल्याचा आरोप आहे. ‘ईडी’चे म्हणणे आहे की, तपासात असे दिसून आले की, सुबोध कुमार गोयल यांच्या यूको बँकेचे अध्यक्ष आणि एमडी म्हणून कार्यकाळात को बँकेने ‘सीएसपीएल’ला मोठी कर्जे मंजूर केली होती, जी नंतर बँकेने इतरत्र वळवली. या बदल्यात गोयलला लाच म्हणून मोठी रक्कम मिळाली.

 

 

लाचेचे पैसे लपविण्यासाठी गोयलने रिअल इस्टेट, लक्झरी वस्तू, हॉटेल बुकिंग इत्यादींसाठी बनावट कंपन्यांचा वापर केल्याचा आरोपही आहे. गोयलच्या आधी ‘ईडी’ने डिसेंबर 2024 मध्ये ‘सीएसपीएल’चे प्रवर्तक संजय सुरेका यांना अटक केली होती आणि फेब्रुवारी 2025 मध्ये आरोपपत्र दाखल केले होते. तसेच, ‘ईडी’ने संजय सुरेका आणि ‘सीएसपीएल’ यांच्या सुमारे 510 कोटी रुपयांच्या मालमत्ताही जप्त केल्या होत्या.