WAVES 2025 मध्ये श्रद्धा कपूरने अ‍ॅडम मोसेरीला भरवली घरगुती पुरणपोळी; भारतीय संस्कृतीचा गोड स्पर्श जागतिक व्यासपीठावर!
Total Views |
मुंबई : ( Shraddha Kapoor Adam Mosseri at WAVES 2025 ) वेव्स २०२५ समिट मध्ये एक भावस्पर्शी आणि सांस्कृतिकदृष्ट्या समृद्ध क्षण अनुभवायला मिळाला, जेव्हा बॉलीवूड अभिनेत्री श्रद्धा कपूरने Instagram आणि Meta चे CEO अ‍ॅडम मोसेरी यांना खास घरगुती पुरणपोळी भरवली. श्रद्धाच्या या गोड भावनेने उपस्थितांचं आणि इंटरनेटवर चाहत्यांचं मन जिंकलं. मंचावर आत्मविश्वासाने उभी राहत श्रद्धा कपूरने अ‍ॅडम मोसेरीकडे एक ताट नेलं आणि हास्यस्मित करत म्हणाली, "तुम्ही आजवर खूप फॅन्सी ठिकाणी खाल्लंय, पण मी तुम्हाला एक खास महाराष्ट्रीयन गोड पदार्थ खाऊ घालू इच्छिते – याला पुरणपोळी म्हणतात, आणि ही माझ्या घरी बनवलेली आहे."
पुरणपोळी ही महाराष्ट्रातील पारंपरिक गोड पदार्थ असून, हरभऱ्याच्या डाळीपासून आणि गुळाच्या मिश्रणातून तयार होते. ती विशेषतः सणावाराच्या दिवशी घराघरांत केली जाते. श्रद्धाच्या घरून आलेली ही पुरणपोळी या जागतिक व्यासपीठावर आपल्या सांस्कृतिक मुळे अधोरेखित करत होती. अ‍ॅडम मोसेरी यांनी ती पुरणपोळी नम्रतेने स्वीकारली आणि एक घास घेताच आनंदाने माना हलवत मनापासून कौतुक केले. उपस्थित प्रेक्षकांनी टाळ्यांच्या गजरात या प्रसंगाचं स्वागत केलं. एका आंतरराष्ट्रीय तंत्रज्ञान प्रमुखाने भारतीय संस्कृतीच्या स्वादाचा अनुभव घेतल्याने, हा एक विलक्षण सांस्कृतिक संगम ठरला.
सोशल मीडियावर हा क्षण तात्काळ व्हायरल झाला. अनेकांनी याला “व्होलसम” आणि “अनपेक्षित पण हृद्य” असा प्रतिसाद दिला. Pinkvilla ने त्यांच्या रीलला कॅप्शन दिलं – “द सीईओ ऑफ इंस्टाग्राम @mosseri इटिंग पुरणपोळी विथ @shraddhakapoor. या जागतिक स्तरावरील कार्यक्रमात, जिथे सामान्यतः ब्रँड प्रमोशन्स आणि मोठमोठ्या व्याख्यानांचा पसारा असतो, तिथे श्रद्धाच्या या साध्या पण आपुलकीच्या कृतीने एक वेगळाच गोडवा निर्माण केला. हा प्रसंग केवळ एक सेलिब्रिटी आणि एका सीईओ यांच्यातला नव्हता, तर भारतीय आदरातिथ्य, प्रेम आणि घरगुती गोडव्याचा जगभर पोहोचणारा संदेश होता.