ऐतिहासिक एल्फिन्स्टन पूल वाहतुकीसाठी बंद

 

 

मुंबई: ( Elphinstone Bridge closed ) शहराच्या मध्यवर्ती भागातील १२५ वर्षे जुना एल्फिन्स्टन रोड ओव्हर ब्रिज अखेर गुरुवार, दि. २४ रोजी रात्री ९ वाजल्यापासून वाहतुकीसाठी बंद करण्यात आला आहे.

 

प्रवाशांची गैरसोय टाळण्यासाठी वाहतुकीमध्ये काही ठिकाणी वेळा निश्चित करण्यात आल्या आहेत. तर ७ मार्ग ‘नो पार्किंग झोन’ म्हणून जाहीर करण्यात आले आहेत. परळ व प्रभादेवी रेल्वे स्थानकावरील पूर्व-पश्चिमेला जोडणारा एल्फिन्स्टन ब्रिज तोडून त्याठिकाणी नवीन ब्रिज तसेच शिवडी-वरळी एलिव्हेटेड कनेक्टर उड्डाणपुलाचे काम मुंबई महानगर प्रादेशिक विकास प्राधिकरणामार्फत करण्यात येणार आहे.

 

या कामासाठी एल्फिन्स्टन ब्रिजमार्गे जाणारी वाहतूक तात्पुरत्या स्वरूपात बंद करण्याचा निर्णय वाहतूक पोलिसांनी घेतला आहे. रहिवाशी आणि प्रवाशांची गैरसोय टाळण्यासाठी वाहतूक विभागाने नागरिकांकडून सूचना मागवल्या होत्या. त्यानुसार बुधवार, दि. २३ एप्रिल रोजी वाहतूक विभागाने अधिसूचना जारी करत एल्फिन्स्टन ब्रिज गुरुवार, दि. २४ रोजी रात्रीपासून वाहतुकीसाठी बंद करण्याचा निर्णय घेतला आहे.

 

 

परळ व प्रभादेवी परिसरातील नागरिकांना आपत्कालीन परिस्थितीमध्ये रुग्णालयात जाण्या व येण्यासाठी मुंबई महानगर विकास प्राधिकरणामार्फत दोन रुग्णवाहिकांची सोय करण्यात आलेली आहे. एक रुग्णवाहिका प्रभादेवी रेल्वेस्थानक पश्चिम रेल्वे पादचारी पूल येथे व दुसरी रुग्णवाहिका परळ रेल्वेस्थानक पूर्व येथे उपलब्ध करून देण्यात आलेली आहे. यासह रुग्णांकरिता व्हिलचेअरची व्यवस्था करण्यात आलेली आहे.

 

 

ना. म. जोशी मार्ग : कॉम्रेड गुलाबराव गणाचार्य चौक (आर्थर रोड नाका) ते धनमिल नाकापर्यंत दोन्ही वाहिन्या.

सेनापती बापट मार्ग : संत रोहिदास चौक (एल्फिन्स्टन जंक्शन) ते रखांगी जंक्शनपर्यंत दोन्ही वाहिन्या.

महादेव पालव मार्ग : कॉम्रेड कृष्णा देसाई चौक (भारत माता जंक्शन) ते शिंगटे मास्तर चौकपर्यंत दोन्ही वाहिन्या.

साने गुरुजी मार्ग : संत जगनाडे चौक ते कॉम्रेड गुलाबराव गणाचार्य चौकपर्यंत (आर्थर रोड नाका) दोन्ही वाहिन्या.

भवानी शंकर मार्ग : हनुमान मंदिर, कबुतरखाना ते गोपीनाथ चव्हाण चौकपर्यंत दोन्ही वाहिन्या.

रावबहादूर एस. के. बोले मार्ग : हनुमान मंदिर ते पोर्तुगीज चर्चपर्यंत दोन्ही वाहिन्या.

संपूर्ण डॉ. बाबासाहेब आंबेडकर मार्ग दोन्ही वाहिन्या.

 

 

महादेव पालव मार्ग (करी रोड रेल्वे ब्रिज) कॉम्रेड कृष्णा देसाई चौककडून (भारतमाता जंक्शन) शिंगटे मास्तर चौककडे वाहतूक एक दिशा सकाळी ७ ते दुपारी ३ वाजेपर्यंत तर यांच्या विरुद्ध दिशेची वाहतूक दुपारी ३ ते रात्री ११  वाजेपर्यंत एक दिशा चालू राहील.

महादेव पालव मार्ग (करी रोड रेल्वे ब्रिज) दोन्ही वाहिन्या रात्री ११ ते सकाळी ७ वाजेपर्यंत वाहतुकीसाठी चालू राहील.

 

 

सेनापती बापट मार्ग : वडाचा नाका ते फितवाला जंक्शनपर्यंत दुहेरी मार्ग चालू राहील.

पूर्वेकडून पश्चिमेकडे जाणार्‍या वाहनांकरिता

दादर पूर्वेकडून दादर पश्चिमकडे व दादर मार्केटकडे जाणारे वाहनचालक हे टिळक ब्रिजचा वापर करतील.

परळ पूर्वकडून प्रभादेवी व लोअर परळला जाणारे वाहनचालक हे करी रोड ब्रिजचा वापर करतील (सकाळी ७ ते दुपारी ३ वाजेपर्यंत).

परळ, भायखळा पूर्वेकडून प्रभादेवी, वरळी, कोस्टल रोड व सी-लिंकच्या दिशेने जाणारे वाहनचालक हे चिंचपोकळी ब्रिजचा वापर करू शकतील.

पश्चिमेकडून पूर्वेकडे जाणार्‍या वाहनांकरिता

दादर पश्चिमेकडून दादर पूर्वेकडे जाणारे वाहनचालक हे टिळक ब्रिजचा वापर करतील.

प्रभादेवी व लोअर परळ पश्चिमेकडून परेलला, टाटा रुग्णालय व के. ई. एम. रुग्णालय येथे जाणारे वाहनचालक हे करी रोड ब्रिजचा वापर करतील (दुपारी ३ ते रात्री ११ वाजेपर्यंत).

कोस्टल रोड व सी-लिंक व प्रभादेवी, वरळीकडून परळ, भायखळा पूर्वकडे जाणारे वाहनचालक हे चिंचपोकळी ब्रिजचा वापर करतील.