मुंबईमध्ये रंगणार ग्लोबल कोकण महोत्सव २०२५

मुंबई : कोकणचा विकास म्हणजे केवळ मोठमोठे प्रकल्प नाहीत, तर आपली संस्कृती, आपली माणसं आणि आपला निसर्ग जपत पुढे जाण्याचा प्रवास आहे. हाच विचार पुढे नेण्यासाठी कोकण भूमी प्रतिष्ठान घेऊन येत आहे, ग्लोबल कोकण महोत्सव २०२५, दिनांक ६ मार्च ते ९ मार्च दरम्यान नेस्को ग्राउंड, गोरेगाव (मुंबई) येथे हा भव्य सोहळा रंगणार आहे. या कार्यक्रमाचे अध्यक्षपद उद्योग मंत्री उदय सामंत भूषवणार असून, या कार्यक्रमाच्या स्वागताध्यक्षपदी रोजगार हमी योजना मंत्री भारत गोगावले असणार आहेत. या महोत्सवाचे प्रमुख मार्गदर्शक महाराष्ट्राचे माहिती तंत्रज्ञान मंत्री आशिष शेलार, वनमंत्री गणेश नाईक आणि महाराष्ट्राचे खाण मंत्री शंभुराज देसाई असणार आहेत.

कोकण भूमी प्रतिष्ठानचे अध्यक्ष्य श्री संजय यादवराव यांनी माध्यमांना दिलेल्या माहितीनुसार 'यावर्षी ग्लोबल कोकण महोत्सवातील सर्वात महत्त्वाचा विषय म्हणजे ‘कोकण बिझनेस कॉन्क्लेव्ह’. या चार दिवसांमध्ये एक भव्य मार्गदर्शन सेमिनार सुरू करण्यात येणार आहे. या कक्षात शेती, पर्यटन, मासेमारी, प्रक्रिया उद्योग, स्टार्टअप्स आणि शासकीय योजनांवरील तज्ज्ञ मंडळी प्रत्यक्ष येऊन कोकणवासीयांना वैयक्तिक मार्गदर्शन करतील. याशिवाय, छोटे-छोटे वर्कशॉप्स आयोजित करण्यात येणार आहेत, जे कोकणातील तरुणांना आणि उद्योजकांना नव्या संधी शोधण्यास मदत करतील.

दररोज संध्याकाळी ५ ते १० वाजेपर्यंत कोकणच्या रंगारंग लोकसंस्कृतीचा सोहळा रंगणार आहे! कोकणातील सर्वोत्तम दशावतार नाट्यप्रयोग, परदेशात झळकणारे पहिले नमन सादरीकरण, आदिवासी परंपरेचा अभिमान – तारपा नृत्य, पालखी नृत्य, जाखडी नृत्य, गौरी नाच, कोकणी कवी संमेलन – शब्दांमधून कोकणाचा आवाज! ‘लाभले आम्हास भाग्य’ – कौशल इनामदार यांचा लोकप्रिय कार्यक्रम पार पडेल. तसेच ८ मार्चला मराठी हिप-हॉपचे भन्नाट सादरीकरण होणार आहे.कोकणचा अस्सल चवदार स्वाद घेण्यासाठी विशेष फूड फेस्टिव्हल आयोजित करण्यात आला आहे. यात मालवणी, आगरी, संगमेश्वरी, वाडवळ, सीकेपी, ब्राह्मणी अशा विविध खाद्यसंस्कृतींचे खास पदार्थ चाखायला मिळणार आहेत.

आपलं कोकण म्हणजे केवळ गाव नाही, तर आपली ओळख आहे. ही संस्कृती, ही माती आपलीच आहे, मग ती सोडून जाणं योग्य का? कोकणात जमीन विकण्यापेक्षा ती विकसित करावी, बंद घरे सुरू करावीत, रिकाम्या शाळा पुन्हा गजबजून द्याव्यात, आणि स्थानिक अर्थव्यवस्था बळकट करावी.याच उद्दिष्टाने शिवस्वराज्य लोक चळवळ आणि ग्लोबल कोकण अखंड कार्यरत आहेत. कोकणच्या मातीशी आपली नाळ जुळलेली प्रत्येकाने या महोत्सवात सहभागी होऊन या चळवळीला बळ द्यावं!