समर्थ विचारांचा भव्य जागर 'राष्ट्रगुरु समर्थ रामदास' लवकरच प्रेक्षकांच्या भेटीला!

मुंबई : मराठी चित्रपटसृष्टीत ऐतिहासिक आणि आध्यात्मिक चित्रपटांना कायमच विशेष स्थान मिळालं आहे. आता या परंपरेत भर घालत, समर्थ रामदास स्वामींच्या जीवनावर आधारित ‘राष्ट्रगुरु समर्थ रामदास’ हा चित्रपट लवकरच प्रेक्षकांच्या भेटीला येतोय. नुकत्याच प्रदर्शित झालेल्या टिझरला उत्स्फूर्त प्रतिसाद मिळत असून, हा चित्रपट केवळ ऐतिहासिक दृष्टिकोनातून नव्हे, तर समर्थ रामदास स्वामींच्या विचारांचा आधुनिक काळाशी संवाद घडवणारा आहे.

या चित्रपटाचं दिग्दर्शन प्रसिद्ध व्हिएफएक्स डिझायनर अनिकेत साने यांनी केलं आहे. ‘जंगलबुक’सारखा भव्य दृष्यात्म अनुभव मराठीतही यावा, या इच्छेने त्यांनी तब्बल १० वर्षं संशोधन आणि मेहनत करून हा चित्रपट साकारला. रामदास स्वामींच्या चरित्राचा सखोल अभ्यास, ‘दासबोध’वरील चिंतन आणि ऐतिहासिक दस्तऐवजांच्या संशोधनातून हा प्रोजेक्ट साकारला गेला आहे.

अनिकेत साने यांनी ‘सनी’, ‘झिम्मा २’, ‘गांधी टॉक्स’, ‘सनफ्लॉवर’ यांसारख्या मोठ्या प्रोजेक्ट्ससाठी उत्कृष्ट व्हिएफएक्स डिझाइन केलं आहे. त्यांच्या या अनुभवाचा उपयोग करून, ‘राष्ट्रगुरु समर्थ रामदास’ मध्ये अप्रतिम दृश्यसंयोजन आणि ऐतिहासिक स्थळांचे भव्य पुनर्निर्माण करण्यात आले आहे. सज्जनगड, काळाराम मंदिर, जांब समर्थ यांसारखी ऐतिहासिक स्थळं हुबेहुब उभी करण्यात आली असून, यामुळे प्रेक्षकांना थेट १६व्या शतकात गेल्याचा भास होईल.

हा चित्रपट केवळ समर्थ रामदास स्वामींच्या चरित्रावर प्रकाश टाकत नाही, तर त्यांच्या विचारसरणीचा आजच्या काळाशी कसा संबंध आहे, हे प्रभावीपणे दाखवतो. कर्मयोग, भक्ती आणि राष्ट्रनिष्ठा या संकल्पनांचा नव्याने विचार करायला लावणारा हा चित्रपट समर्थांच्या शिकवणींचा आधुनिक काळात जागर घालणार आहे.

"‘राष्ट्रगुरु समर्थ रामदास’ हा केवळ चित्रपट नाही, तर एक चळवळ आहे. समर्थ रामदास स्वामींच्या विचारांचा जागर नव्या पिढीपर्यंत पोहोचवणं हे माझं ध्येय आहे. हा चित्रपट ऐतिहासिक असूनही पूर्णतः कालातीत आहे कारण समर्थ विचार आजही तितकेच महत्त्वाचे आहेत."

लवकरच हा भव्य ऐतिहासिक प्रवास मोठ्या पडद्यावर अनुभवायला मिळणार आहे. प्रेक्षकांमध्ये उत्सुकता शिगेला पोहोचली आहे, आणि समर्थ रामदास स्वामींच्या जीवनाचे प्रेरणादायी दर्शन घडवणारा हा चित्रपट ऐतिहासिक ठरणार आहे!