भारतात उरले केवळ ३ इंडस रिव्हर डाॅल्फिन; परिस्थिती गंभीर

इंडस रिव्हर डाॅल्फिनला सिंधू नदी डाॅल्फिन असेही म्हटले जाते. सध्या भारतामध्ये या प्रजातीचा अधिवास केवळ पंजाब राज्यातील बियास या नदीमध्ये शिल्लक राहिला आहे. ही नदीच्या सर्वसाधारण खोली ही २.२ मीटर असून तिची रुंदी २३८ मीटर आहे. १९६० साली डाॅल्फिनची ही प्रजात भारतामधून नामशेष झाल्याची शक्यता वर्तविण्यात आली होती. मात्र, २००७ साली ही प्रजात पुन्हा एकदा भारतात आढळून आली. पंजाब वन विभाग आणि डब्लूडब्लूएफ - इंडिया या संस्थेने २०१८ साली बियास नदीत इंडस रिव्हर डाॅल्फिनसंदर्भात सर्वेक्षण केले होते. या सर्वेक्षणामध्ये त्यांना सहा डाॅल्फिन आढळून आले. मात्र, २०२२ साली या अहवालासाठी केलेल्या सर्वेक्षणामध्ये केवळ तीन डाॅल्फिन आढळून आले आहेत. बियास नदीमधील १०१ किलोमीटर परिसरात हे सर्वेक्षण पार पडले. तीन डाॅल्फिनमधील दोन प्रौढ आणि एक नवजात डाॅल्फिनचा समावेश होता. मात्र, मार्च २०२४ रोजी यामधील एका मादी डाॅल्फिनचा मृत्यू झाल्याची माहिती पंजाब वन विभागाने प्रसिद्ध केली आहे. या मादीच्या शवविच्छेदनावेळी तिच्या पोटात अर्भक सापडले आहे.