चंद्रपूरात एकाच दिवशी तीन वन्यजीवांचा रेल्वे-रेस्ते अपघातात मृत्यू

बल्लारशाह - गोंदिया रुळावर मामला वनपरिक्षेत्रात कक्ष क्रमांक ४१३ मध्ये चंद्रपूर कडे येणाऱ्या पॅसेंजर रेल्वेच्या धडकेत मादी सांबराचा दुर्दैवी मृत्यू झाल्याची घटना गुरुवारी पहाटे निदर्शनास आली. रस्ते अपघातात अज्ञात वाहणाच्या धडकेत भद्रावती हायवेवर पेट्रोल पंपजवळ नर चितळाचा आणि वरोरा येथे आनंदवन चौकाजवळ हायवेवर साळींदराचा दुर्दैवी मृत्यू झाल्याची घटना घडली आहे. या तिन्ही वन्यजीवांच्या मृत्यूची घटना एकाच दिवशी घडली आहे. बल्लारशाह - गोंदिया हा रेल्वे रुळ तर वन्यजिवांसाठी मृत्यूचा सापळा ठरलेला आहे. आत्तापर्यंत या रेल्वे महामार्गावर १७ वन्यजीवांचा रेल्वेच्या अपघातात मृत्यू झालाचे हॅबिटॅट काॅन्झर्वेशन सोसायटीचे अध्यक्ष दिनेश खाटे यांनी सांगितले. त्यात दोन वाघ, एक बिबट, तीन अस्वल, एक रानगवा, सहा सांबर, एक चितळ, एक हुमा घुबड, एक माकड आणि राजुराजवळ एका वाघाचा समावेश आहे.