अग्निशमन दलाकडून ‘विशेष अग्निसुरक्षा मोहीम’ अंतर्गत १,२२१ आस्थापनांची तपासणी

मुंबई : नववर्ष साजरीकरणाच्या पार्श्वभूमीवर तसेच याच महिन्यात गोव्यातील एका नाईट क्लबमध्ये झालेल्या भीषण आगीत २५ जणांचा मृत्यू झाल्याच्या घटनेनंतर मुंबई अग्निशमन दलाने शहरभर तपासणी मोहीम तीव्र केली आहे. मुंबई अग्निशमन दलाने २२ ते २६ डिसेंबर २०२५ या कालावधीत ‘विशेष अग्निसुरक्षा मोहीम’ अंतर्गत एकूण १,२२१ आस्थापनांची अग्निसुरक्षा तपासणी केली.

या तपासणीदरम्यान अग्निसुरक्षा नियमांचे उल्लंघन आढळलेल्या ५९ आस्थापनांविरोधात कारवाई करण्यात आली, तर २० आस्थापनांना नोटीस बजावण्यात आल्या. याशिवाय, इतर अग्निसुरक्षा निकषांचे पालन करणाऱ्या चार आस्थापनांवरही कारवाई करण्यात आली असून, त्याठिकाणी परवानगीपेक्षा जास्त एलपीजी सिलेंडरचा साठा आढळून आला होता.

तपासणीच्या कक्षेत हॉटेल, रेस्टॉरंट, पब, बार, रूफटॉप ठिकाणे आणि पार्टी हॉल यांचा समावेश होता, जिथे वर्षाअखेरीस मोठ्या प्रमाणात गर्दी होत असते. यामध्ये सुमारे १० मॉल्स, २५ पंचतारांकित हॉटेल्स, १४८ पब, बार व क्लब, १९ रूफटॉप ठिकाणे आणि ६२८ रेस्टॉरंट्सचा समावेश आहे. ही कारवाई ‘महाराष्ट्र आग प्रतिबंधक व जीवसंरक्षक उपाययोजना अधिनियम, २००६’ अंतर्गत करण्यात येत असल्याची माहिती अधिकाऱ्यांनी दिली.

बहुतेक प्रकरणांमध्ये प्रत्यक्ष तपासणीपूर्वी संबंधित प्रभाग कार्यालयांकडून आस्थापनांना नोटीस देण्यात आल्या होत्या. नववर्षाच्या कार्यक्रमांच्या पार्श्वभूमीवर अग्निसुरक्षा नियम व आरोग्य परवाना अटींचे पालन करण्याच्या सूचना देण्यात आल्या होत्या. त्यानुसार फायर कम्प्लायन्स सेल आणि प्रभाग स्तरावर संयुक्तपणे ही विशेष तपासणी मोहीम राबवली जात आहे.

ही विशेष अग्निसुरक्षा मोहीम २८ डिसेंबर २०२५ पर्यंत सुरू राहणार असून, त्यानंतर नियमित तपासणी आणि कारवाई केली जाणार आहे. महानगरपालिका प्रशासनाने सर्व आस्थापनांना अग्निशमन उपकरणे कार्यरत ठेवण्याचे, आपत्कालीन निर्गमन मार्ग मोकळे ठेवण्याचे आणि ठरवलेल्या क्षमतेनुसारच गर्दी ठेवण्याचे निर्देश दिले आहेत. यापूर्वी १९ डिसेंबर २०२५ रोजी मुंबई अग्निशमन दलाने वरळी येथील नॅशनल स्पोर्ट्स क्लब ऑफ इंडिया (एनएससीआय) ला अग्निसुरक्षा व जीवसंरक्षक उपायांतील त्रुटींवरून नोटीस बजावली होती. मात्र, क्लब प्रशासनाने आवश्यक सुधारात्मक उपाय केल्याचा दावा केला आहे. दरम्यान, बीएमसी प्रशासनाने नागरिकांना नववर्षाच्या कार्यक्रमांना उपस्थित राहताना सतर्क राहण्याचे आणि कुठेही अग्निसुरक्षेतील त्रुटी आढळल्यास तात्काळ संबंधित अधिकाऱ्यांना कळविण्याचे आवाहन केले आहे.