अयोध्येतल्या श्रीराममंदिरावर फडकलेला धर्मध्वज हा संकल्प, संघर्ष आणि अनेक पिढ्यांच्या स्वप्नपूर्तीचे प्रतीक : पंतप्रधान नरेंद्र मोदी

मुंबई : (PM Narendra Modi) अयोध्येतील श्रीराम मंदिराच्या बांधकामाच्या पूर्णत्वाचे प्रतीक म्हणून पंतप्रधान नरेंद्र मोदी यांनी आज (मंगळवार, २५ नोव्हेंबर) मंदिराच्या शिखरावर सनातन धर्मध्वजारोहण केले. या धर्मध्वजारोहण सोहळ्याला देशाचे पंतप्रधान नरेंद्र मोदी, उत्तर प्रदेशच्या राज्यपाल आनंदीबेन पटेल, उत्तर प्रदेशचे मुख्यमंत्री योगी आदित्यनाथ, राष्ट्रीय स्वंयसेवक संघाचे सरसंघचालक मोहनजी भागवत आणि मोठ्या संख्येने साधूसंत उपस्थित होते. आज राम मंदिराच्या बाहेर फडकवण्यात आलेला भगवा ध्वज हे भारताच्या सभ्यतेचे आणि संस्कृतीचे प्रतीक आहे, असे पंतप्रधान नरेंद्र मोदींनी म्हटले आहे.

आज अयोध्यानगरी भारताच्या सांस्कृतिक चेतनेच्या आणखी एका उत्कर्षबिंदूची साक्षीदार बनलीय. आज संपूर्ण भारतासह विश्व राममय झाले आहे. प्रत्येक रामभक्ताच्या ह्रदयात अद्वितीय संतोष, असीम कृतज्ञता, अपार अलौकिक आनंद आहे. अनेक पिढ्यांचे घाव आज भरले आहेत. वेदनेला आता पूर्णविराम मिळतो आहे. अनेक वर्षांपासूनचा संकल्प आज पूर्ण झाला आहे. आज त्या यज्ञाची पूर्णाहुती आहे ज्याचा अग्नि ५०० वर्षांपर्यंत प्रज्वलित राहिला. जो यज्ञ एका क्षणासाठी विझला नाही.

आज भगवान श्रीरामाच्या गर्भगृहाची अनंत ऊर्जा आणि श्रीरामांच्या परिवाराचा दिव्य प्रताप या धर्मध्वजाच्या रुपात प्रतिष्ठापित झाला आहे. हा धर्मध्वज केवळ ध्वज नसून भारताच्या सभ्यतेचे प्रतीक आहे. या ध्वजातला भगवा रंग, यामधील सूर्यवंशाची ख्याती, ओम शब्द, यावर रेखाटलेला कोविदार वृक्ष या सगळ्यातून राम राज्याची किर्ती प्रतिरुपित होत आहे. हा ध्वज संकल्प व यशाचा आहे. ही संघर्षातून सृजनाची गाथा आहे. ध्वज संकल्प व यशाचा आहे. हा ध्वज अनेक शतकांच्या साकार झालेल्या स्वप्नाचं प्रतिक आहे. हा ध्वज संतांची साधना आणि समाजाची प्रेरणा आहे.

येणाऱ्या काळात आणि पुढच्या अनेक शतकापर्यंत हा धर्मध्वज प्रभू श्रीरामाच्या आदर्श सिद्धांतांचा उद्घोष करेल. हा धर्मध्वज 'सत्यमेव जयते'चं आवाहन करेल. सत्याचा नेहमी विजय होतो हेच जगाला सांगेल. हा धर्मध्वज उद्घोष करेल, सत्यम एकपदं ब्रह्म सत्ये धर्मः प्रतिष्ठितः अर्थात सत्य हेच ब्रह्माचे स्वरुप आहे. सत्यातच धर्माची स्थापना झालेली आहे. हा धर्मध्वज प्रेरणा बनेल. प्राण जाए पर वचन न जाए अर्थाच जे सांगितले जाते तेच करावं हेच हा ध्वज संदेश देईल. या विश्वात कर्म आणि कर्तव्याला प्राधान्यता दिली पाहिजे, हेच हा ध्वज सांगेल. हा धर्मध्वज वैर मिटवण्याचा संदेश देईल. सर्वांचे सुख पाहायला सांगेल. भेदभाव आणि पीडेतून मुक्ती देण्यास सांगेल. कोणी दुःखी राहू नये, कोणी दरिद्री राहू नये, गरीबीत राहू नये असा समाज बनवा असं हा ध्वज सांगेल, असे पंतप्रधान मोदी यांनी स्पष्ट केले.