बदकांच्या दुर्मीळ प्रजातींचे कोकण किनाऱ्यांवर दर्शन; दुर्मीळ टिबुकली श्रीकृष्ण तलावात

टिबुकलीमधील काळ्या मानेची टिबुकली ही क्वचितच महाराष्ट्रात स्थलांतर करते. अशा या टिबुकलीचे दुर्मीळ दर्शन बोईसरमध्ये तारापूर रस्त्यावरील श्रीकृष्ण तलावात झाले आहे. रविवार दि. १६ नोव्हेंबर रोजी पक्षीनिरीक्षक आशिष बाबरे हे श्रीकृष्ण तलावानजीक पक्षीनिरीक्षणाकरिता गेले असता, त्यांना या पक्ष्याचे दर्शन घडले. तेव्हापासून हा पक्षी या तलावात वावरत आहे. महाराष्ट्रातील या पक्ष्याची ही दुसरीच नोंद आहे. तिबेटच्या पठारावर प्रजनन करणारे हे पक्षी प्रामुख्याने दक्षिण चीनच्या भागात स्थलांतर करतात, काही वेळा ते उत्तर भारतात येतात. मात्र, मध्य भारतापर्यंत स्थलांतर करुन ते क्वचितच येतात. याशिवाय चतुरंग या बदकाचे दर्शन देवरुखमध्ये पक्षीनिरीक्षक डाॅ. शार्दुल केळकर यांना रविवारीच घडले.