महाविद्यालयीन विद्यार्थ्यांसाठी ८०० ते १००० बस दररोज उपलब्ध करुन देणार : प्रताप सरनाईक यांची घोषणा

हिवाळ्याच्या दिवसांमध्ये, अनेक शाळा आणि महाविद्यालयांकडून विद्यार्थ्यांच्या सहली काढल्या जातात. त्याच पार्श्वभूमीवर राज्य सरकारने विद्यार्थ्यांचा आणि पालकांचा विचार करत हा महत्त्वपूर्ण निर्णय घेतला आहे. ज्यामुळे आता शालेय आणि महाविद्यालयीन विद्यार्थ्यांना परवडणारा आणि सुरक्षित प्रवास करण्यासाठी भाड्यात ५० टक्के सवलत दिली आहे. या निर्णयामुळे शिक्षक, विद्यार्थी आणि पालकांना मोठा दिलासा मिळाला आहे. राज्याचे परिवहन मंत्री प्रताप सरनाईक यांनी रविवार दि. १६ नोव्हेंबर रोजी प्रसिद्ध केलेल्या प्रसिद्धीपत्रकात असे म्हटले आहे की, महाराष्ट्र राज्य परिवहन महामंडळाच्या (एमएसआरटीसी) बस डेपोमधून शाळा आणि महाविद्यालयांना दररोज सुमारे ८०० ते १००० नवीन बसेस उपलब्ध करून दिल्या जाणार आहेत.