बिहारमध्ये दोन टप्प्यात होणार विधानसभा निवडणूक; ६ आणि ११ नोव्हेंबर रोजी मतदान, १४ रोजी निकाल

नवी दिल्ली : केंद्रीय निवडणूक आयोगाने पत्रकार परिषदेत विधानसभा निवडणुकीच्या तारखा सोमवारी पत्रकारपरिषदेत जाहीर केल्या आहेत. निवडणुका दोन टप्प्यात होतील. पहिल्या टप्प्यातील मतदान ६ नोव्हेंबर रोजी आणि दुसऱ्या टप्प्यातील मतदान ११ नोव्हेंबर रोजी होईल. मतमोजणी १४ नोव्हेंबर रोजी होईल.

मुख्य निवडणूक आयुक्त ज्ञानेश कुमार यांनी सांगितले की, पहिल्या टप्प्यातील निवडणुकीसाठी राजपत्र अधिसूचना १० ऑक्टोबर रोजी आणि दुसऱ्या टप्प्यासाठी १३ ऑक्टोबर रोजी जारी केली जाईल. पहिल्या टप्प्यासाठी उमेदवारी अर्ज दाखल करण्याची शेवटची तारीख १७ ऑक्टोबर आणि दुसऱ्या टप्प्यासाठी ३० ऑक्टोबर असेल. १८ आणि २१ ऑक्टोबर रोजी छाननी होईल. २० आणि २३ ऑक्टोबर रोजी उमेदवारी अर्ज मागे घेण्याची अंतिम तारीख आहे.

मुख्य निवडणूक आयुक्त ज्ञानेश कुमार म्हणाले, यावेळी बिहारमध्ये एसआयआर प्रक्रिया पार पडली आणि अंतिम मतदार यादी ३० सप्टेंबर रोजी प्रसिद्ध करण्यात आली. यावेळी बिहारमधील मतदारांसाठी निवडणुका केवळ सुरळीत होणार नाहीत तर त्या शांततेत आणि पूर्णपणे पारदर्शक पद्धतीने पार पडतील. यासाठी निवडणूक आयोगाने सर्व राजकीय पक्ष आणि प्रशासकीय अधिकाऱ्यांशी भेट घेतली आहे आणि महत्त्वाच्या सूचना घेतल्या आहेत. त्यांनी पुढे सांगितले की, बिहारमध्ये एकूण २४३ विधानसभेच्या जागा आहेत, ज्यामध्ये २०३ सामान्य जागा, २ अनुसूचित जमातीच्या जागा आणि ३८ अनुसूचित जातीच्या जागा आहेत

बिहारमध्ये एकूण मतदारांची संख्या ७४.३ दशलक्ष आहे. बिहारमध्ये पहिल्यांदाच मतदान करणाऱ्यांची संख्या १४ लाख आहे. यावेळी, मतदारांच्या सोयीसाठी, निवडणूक आयोगाने प्रत्येक मतदान केंद्रावर मतदारांची संख्या १,२०० पर्यंत मर्यादित ठेवण्याचा निर्णय घेतला आहे. परिणामी, मतदान केंद्रांची संख्या वाढेल. प्रत्येक मतदान केंद्रावर वेबकास्टिंगची सुविधा दिली जाईल, ज्यामुळे अधिकाऱ्यांना संपूर्ण प्रक्रियेवर लक्ष ठेवता येईल.

दरम्यान, निवडणूक आयोगाने सात राज्यांमधील आठ विधानसभा जागांसाठी पोटनिवडणुकांच्या तारखा देखील जाहीर केल्या आहेत. या निवडणुकांसाठी मतदान ११ नोव्हेंबर २०२५ रोजी होणार आहे. ज्या जागांवर पोटनिवडणुका होणार आहेत त्यामध्ये राजस्थानमधील अंता, जम्मू आणि काश्मीरमधील बडगाम आणि नागरोटा, पंजाबमधील तरनतारन, झारखंडमधील घाटशिला, तेलंगणातील जुबली हिल्स, मिझोराममधील दंपा आणि ओडिशातील नुआपाडा यांचा समावेश आहे. या जागांसाठीचे निकाल देखील १४ नोव्हेंबर रोजी जाहीर केले जातील.