"सनातनचा अपमान सहन करणार नाही"; वकिलाकडून सरन्यायाधीश गवई यांच्यावर बूट फेकून मारण्याचा प्रयत्न, सर्वोच्च न्यायालयात गदारोळ, नेमकं काय घडलं?

नवी दिल्ली : (CJI Bhushan Gavai) सर्वोच्च न्यायालयात सरन्यायाधीश भूषण गवई यांच्यावर हल्ल्याचा प्रयत्न झाला. एका वकिलाने सुनावणी सुरू असताना सरन्यायाधीशांच्या दिशेनं बूट फेकून मारण्याचा प्रयत्न केला. मात्र, सुरक्षारक्षकांनी त्याला अडवले आणि न्यायालयातून बाहेर नेत पोलिसांच्या ताब्यात दिले.

नेमकं काय घडलं?

माध्यमांमधून आलेल्या वृत्तानुसार, सरन्यायाधीश गवई यांच्या खंडपीठासमोर एका खटल्याची सुनावणी सुरू असताना हा वकील सरन्यायाधीशांजवळ पोहोचला. त्यानंतर तो पायातला बूट काढू लागला. तो बूट काढून सरन्यायाधीशांच्या दिशेने फेकणार इतक्यात सुरक्षारक्षकांनी त्याला अडवले. त्याला पकडून न्यायालयाबाहेर नेले आणि पोलिसांच्या ताब्यात दिले. यावेळी बाहेर नेत असताना "सनातन का अपमान... नही सहेगा हिंदुस्तान" अशा घोषणा या वकिलाने दिल्या.

सरन्यायाधीश काय म्हणाले?

दरम्यान, या घटनेनंतर सरन्यायाधीशांनी न्यायालयात सुरु असलेले कामकाज थांबवले नाही. न्यायालयात उपस्थित असलेल्या वकिलांना त्यांचे युक्तिवाद सुरू ठेवण्यास सांगितले. पुढील कार्यवाही सुरु ठेवण्याचे आवाहन करत ते म्हणाले, "हे सगळं पाहून कोणीही विचलित होऊ नका. मीही विचलित झालेलो नाही. अशा घटनांचा मला काहीच फरक पडत नाही. या गोष्टींचा माझ्यावर परिणाम होत नाही."

या घटनेतील आरोपी वकिलाचे नाव राकेश किशोर आहे. मध्यप्रदेशमधील खजुराहो मंदिर परिसरातील जावरी मंदिरातील सात फूट उंच भगवान विष्णूंच्या शिरच्छेदित पुतळ्याचा जीर्णोद्धार करण्याची मागणी करणारी याचिका सर्वोच्च न्यायालयाने गेल्या महिन्यात १७ सप्टेंबर रोजी फेटाळून लावली होती. न्यायालयाने स्पष्ट केलं की, हे प्रकरण पुरातत्व सर्वेक्षण विभागाच्या (एएसआय) अखत्यारित येते. यावेळी सरन्यायाधीश बी. आर. गवई त्यावेळी म्हणाले होते की "तुम्ही इथून जा आणि भगवान विष्णूकडेच प्रार्थना करा आणि त्यालाच काहीतरी करायला सांगा. तुम्ही असं म्हणताय की तुम्ही भगवान विष्णूचे भक्त आहात. मग भगवान विष्णूलाच काहीतरी करायला सांगा."