मुंबई विमानतळावर सापडला चक्क अ‍ॅनाकोंडा

मुंबई (विशेष प्रतिनिधी) - मुंबई आंतराराष्ट्रीय विमानतळावरुन बुधवार दि. २२ आॅक्टोबर रोजी रात्री मुंबई कस्टम विभागाकडून १५४ परदेशी वन्यजीवांची तस्करी उघडकीस आणण्यात आली (exotic animal). यामध्ये अॅनकोंडा या सापासह काही सरडे आणि कासव ताब्यात घेण्यात आली (exotic animal). या प्रकरणी वन्यजीव तस्काराला ताब्यात घेण्यात आले असून मुंबई विमानतळावर जुलै ते आॅक्टोबर या काळात घडलेले परदेशी वन्यजीवांच्या तस्करीचे हे १८ वे प्रकरण असून यामाध्यमातून ६०० हून अधिक परदेशी वन्यजीवांना ताब्यात घेण्यात आले आहे (exotic animal).

 

 

बुधवारी मध्यरात्री मुंबई आंतरराष्ट्रीय विमानतळावर थायलॅण्डवरुन आलेल्या थाय व्हिएतजेट एअर या कंपनीच्या विमानात मुंबई कस्टमच्या अधिकाऱ्यांना काही वन्यजीव सापडले. सामानाची तपासणी केली असता अधिकाऱ्यांना प्लास्टिकच्या डब्ब्यांमध्ये भरुन ठेवलेले काही वन्यजीव आढळून आले. यामध्ये अॅनाकोंडाच्या पिल्लासह, इगुआना, कासव, ड्रॅगन, सरडे, रकून आणि काही साप मिळून एकूण १५४ परेदशी वन्यजीव होते. तपासणीअंती या मालाची वाहतूक करणाऱ्या एका भारतीय महिलेला मुंबई कस्टम अधिकाऱ्यांकडून अटक करण्यात आली. ही महिला ठाण्यातील रहिवासी आहे.या प्राण्यांची सुरक्षित हाताळणी आणि वैद्यकीय मदतीसाठी 'राॅ' (रेस्किंक असोसिएशन फॉर वाइल्डलाइफ वेल्फेअर) या संस्थेच्या वन्यजीव बचाव पथकाला पाचारण करण्यात आले.

 

हे प्राणी सायटीस (संकटग्रस्त प्रजातींसाठी आंतरराष्ट्रीय व्यापारावरील अधिवेशन) आणि वन्यजीव संरक्षण कायदा, १९७२अंतर्गत संरक्षित आहेत. त्यामुळे या महिलेवर सीमाशुल्क कायदा, १९६२ आणि वन्यजीव संरक्षण कायदा, १९७२ च्या तरतुदींनुसार गुन्हा दाखल करण्यात आला आहे. वन्यजीव गुन्हे नियंत्रण विभागाने जारी केलेल्या कायद्यांच्या तरतुदींनुसार या प्राण्यांना मूळ देशात परत पाठवले जाणार आहे. गुरुवारी रात्री या प्राण्यांना थायलॅण्डला पाठवले जाईल. मात्र, यानिमित्ताने मुंबई विमानतळवर परदेशी वन्यजीवांच्या तस्करीचे सत्र सुरूच असल्याचे निदर्शनास येत आहे.