"...म्हणून पाकिस्तान व अमेरिकेची जवळीक वाढतेय"; पाकिस्तान - अमेरिका संबंधांवर माजी RAW प्रमुखांचं विधान

नवी दिल्ली : (Ex RAW chief Vikram Sood on US Pakistan Relations)भारताची गुप्तचर संस्था रिसर्च अ‍ॅन्ड अ‍ॅनालिसिस विंगचे (RAW) प्रमुख विक्रम सूद यांनी पाकिस्तान आणि अमेरिकेची वाढती जवळीक, भारत - पाकिस्तान संघर्ष, पहलगाम दहशतवादी हल्ला आणि नुकत्याच झालेल्या आशियाई चषक स्पर्धेच्या अंतिम सामन्यात मोहसीन नक्की यांनी घातलेला गोंधळ या सगळ्यावर भाष्य केले आहे.

विक्रम सूद यांनी एएनआय या वृत्तसंस्थेशी संवाद साधला. यावेळी ते म्हणाले, "पहलगाममध्ये झालेल्या दहशतवादी हल्ल्यानंतर भारतीय लष्कराने पाकिस्तानमधील दहशतवाद्यांविरोधात ऑपरेशन सिंदूर राबवले. त्यानंतर भारत आणि पाकिस्तानमध्ये संघर्ष सुरू झाला होता. हा लष्करी संघर्ष मी थांबवला असा दावा अमेरिकेचे अध्यक्ष डोनाल्ड ट्रम्प यांनी केला. मात्र, भारताने ट्रम्प यांचा दावा कधीच मान्य केला नाही. त्यामुळेच ट्रम्प यांनी पाकिस्तानशी जवळीक वाढवली आहे."

"अमेरिका सध्या डीप स्टेटच्या भूमिकेत आहे. भारताची ताकद वाढत आहे आणि अमेरिका भारताच्या आर्थिक प्रगतीच्या मार्गात अडथळा ठरत आहे. ट्रम्प यांच्या वैयक्तिक नाराजीतून हे सगळे सुरू झाले आहे. भारताने त्यांना भारत-पाकिस्तानमधील युद्धविरामाचं श्रेय देण्यास नकार दिल्यामुळे ट्रम्प यांचा थयथयाट होतोय. ट्रम्प यांनी युद्ध थांबवल्याचा दावा केल्यानंतर पाकिस्तानी नेत्यांनी मात्र ट्रम्प यांच्यासमोर गुडघे टेकले होते. त्यानंतर पाकिस्तान आणि ट्रम्प यांच्यात मैत्री वाढू लागली. हे सगळं डीप स्टेटचं कारस्थान आहे. भारत आर्थिकदृष्ट्या मजबूत होऊ नये असं त्यांना वाटतं." असे सूद यांनी म्हटले आहे. 

विक्रम सूद पुढे म्हणाले, "भारताची वेगाने होत असलेली आर्थिक प्रगती अमेरिकेच्या पचनी पडत नाही. भारत आणि चीन या जगातील दोन नव्या मोठ्या महासत्ता आहेत. आपण जेव्हा राष्ट्रवादाबद्दल चर्चा करतो तेव्हा काही लोक याला हिंदू राष्ट्रवाद अशी टिप्पणी करून नाकारतात. खरंतर चीन मोठी आर्थिक शक्ती बनला आहे. भारतही त्याच मार्गावर आहे आणि हे अमेरिकेला बघवत नाहीये. त्यामुळे अमेरिका सातत्याने भारताला डावलण्याचा, डिवचण्याचा प्रयत्न करतेय. तर, दुसरीकडे पाकिस्तानचा उदोउदो करतेय. काही दिवसांपूर्वीच ट्रम्प यांनी पाकिस्तानचे लष्करप्रमुख असीम मुनीर यांचा अत्यंत महत्त्वाची व्यक्ती असा उल्लेख केला"