पालघर साधू हत्याकांड प्रकरणी CBI कडून ३ नवीन एफआयआर दाखल

 

मुंबई : (Palghar sadhu mob lynching case) २०२० मधील पालघर येथे दोन साधू आणि त्यांच्या चालकाला जमावाने केलेल्या मारहाणीच्या (मॉब लिंचिंग) घटनेनंतर पाच वर्षांनी, केंद्रीय अन्वेषण विभागाने (CBI) या प्रकरणाचा नव्याने तपास सुरू करण्यासाठी पूर्वी दाखल झालेले पोलीस गुन्हे पुन्हा नोंदवले आहेत.

 

महाराष्ट्र सरकारने मे २०२२ मध्ये नवीन चौकशीसाठी संमती दिल्यानंतर आणि २०२३ मध्ये सुप्रीम कोर्टाने त्यास मान्यता दिल्यानंतर, घटनेच्या ५ वर्षांनंतर सीबीआयने हे पाऊल उचलले आहे आणि या प्रकरणात तीन स्वतंत्र एफआयआर (FIR) दाखल केले आहेत.

 

१६ एप्रिल २०२० रोजी पालघरच्या गडचिंचले गावात ही घटना घडली होती. पालघरच्या कासा पोलीस ठाण्यात १६ ते १८ एप्रिल २०२० या कालावधीत सुरुवातीला हे तीन गुन्हे दाखल करण्यात आले होते. नंतर जिल्ह्याच्या पोलिसांकडून हा तपास महाराष्ट्र सीआयडीकडे (CID) सोपवण्यात आला होता.

 

राज्य सीआयडीने जुलै-ऑगस्ट २०२० मध्ये डहाणू सत्र न्यायालयात या प्रकरणांमध्ये तीन आरोपपत्रे सादर केली होती. सीआयडीच्या तपासात असा निष्कर्ष काढण्यात आला होता की, ही हत्या पूर्व-नियोजित नव्हती, परंतु चोर आणि मूल पळवणारी टोळी गावात फिरत असल्याच्या अफवांमुळे जमावाने हे कृत्य केले. सुरतमध्ये अंत्यसंस्कारासाठी जात असलेल्या साधूंनी, कोविड-१९ लॉकडाऊनमुळे लावलेले पोलीस नाके टाळण्यासाठी चालकाला मुख्य रस्ता ऐवजी दुसऱ्या मार्गाने (जंगल भागातून) जाण्यास सांगितले होते. त्यांच्या असामान्य मार्गामुळे गावकऱ्यांमध्ये संशय निर्माण झाला आणि त्यांच्यावर हल्ला करण्यात आला.

४०० ते ५०० लोकांच्या जमावाने साधूंना वाचवण्यासाठी घटनास्थळी धावलेल्या पोलीस पथकावरही हल्ला केला. पीडित वाहनात असतानाच दगडफेक करण्यात आली आणि जमावाने ते वाहन उलटवले, ज्यामुळे त्यांचा मृत्यू झाला.

 

 

पहिला एफआयआर: १६-१७ एप्रिल २०२० रोजी कासा पोलीस ठाण्यात दाखल असलेल्या गुन्ह्यावर आधारित आहे. यात नऊ आरोपींची नावे असून जमावाने साधू, त्यांचा चालक आणि तीन सरकारी कर्मचाऱ्यांवर कसा हल्ला केला व त्यांना मारण्याचा प्रयत्न कसा केला, याचे तपशील आहेत. या एफआयआरनुसार, साधूंना 'संत नसून चोर' असल्याचे सांगून गडचिंचले येथे ४०० ते ५०० लोकांच्या हिंसक जमावाने थांबवले.

 

दुसरा एफआयआर: एपीआय काळे यांच्या तक्रारीवरून १८ एप्रिल २०२० रोजी कासा पोलिसांनी दाखल केलेल्या एफआयआरवर आधारित आहे. यात पाच आरोपी आणि इतर '४०० ते ५००' अज्ञात लोकांचा समावेश आहे. जमावातील कोणीतरी पोलिसांना सरकारी वाहनातील लोकांना न सोडण्याचे व त्यांच्या ताब्यात देण्याचे आवाहन केले होते.

तिसरा एफआयआर: १७ एप्रिल २०२० रोजी कासा पोलिसांनी, तत्कालीन उपविभागीय पोलीस अधिकारी बी. सोनावणे यांच्या तक्रारीवरून दाखल केलेल्या गुन्ह्यावर आधारित आहे. या एफआयआरमध्ये विनेश भावर आणि इतर १०० ते १२५ अज्ञात व्यक्तींची नावे आहेत. आरोपींना पकडण्यासाठी गेलेल्या पोलीस पथकावर जमावाने हल्ला केला आणि त्यांना 'मारण्याचा प्रयत्न' केल्याचा उल्लेख या एफआयआरमध्ये आहे. जमावाला पांगवण्यासाठी एका वरिष्ठ पोलीस अधिकाऱ्याने त्याच्या सर्व्हिस पिस्तूलमधून एक गोळी झाडावी लागली होती.