महाभारतातील ‘कर्ण’ अभिनेते पंकज धीर यांचं निधन

मुंबई : सिनेविश्वातून एक वाईट बातमी समोर आली आहे. अभिनेते पंकज धीर यांचं निधन झालं आहे. बी. आर. चोप्रा यांच्या ‘महाभारत’ या मालिकेत कर्ण ही भूमिका त्यांनी साकारली होती. तसेच या भूमिकेमुळे त्यांना मोठी प्रसिद्धी मिळाली होती. दरम्यान पंकज हे कॅन्सरशी झुंज देत होते. अखेर आज १५ सप्टेंबर रोजी त्यांची प्राणज्योत मालवली. पंकज यांनी आधी कॅन्सरवर यशस्वीरित्या मात केली होती. परंतु काही महिन्यांपूर्वी पुन्हा त्यांना कॅन्सरचं निदान झालं होतं. त्यासाठी त्यांच्यावर शस्त्रक्रिया करण्यात आली होती. वयाच्या ६८ व्या वर्षी त्यांनी अखेरचा श्वास घेतला. त्यांचे जुने मित्र आणि सहकारी अमित बहल याविषयी माहिती दिली आहे.

पंकज यांच्या निधनाने कलाविश्वावर मोठी शोककळा पसरली आहे. त्यांचे अनेक सहकारी आणि सहकलाकार यांनी दुःख व्यक्त केलं आहे. ‘महाभारता’त अर्जुनाची भूमिका साकारणारे अभिनेते फिरोज खान यांनी पंकज यांच्याविषयी म्हटलं आहे, “हे खरंय की ते आता हयात नाहीत. वैयक्तिकदृष्ट्या मी माझ्या सर्वांत चांगल्या मित्राला गमावलंय. व्यक्ती म्हणून ते खूप चांगले होते. मला अजूनही विश्वास बसत नाहीये की त्यांचं निधन झालं आहे”. याशिवाय त्यांच्या अनेक चाहत्यांनी देखील त्यांनी श्रद्धांजली वाहिली आहे.

पंकज धीर यांनी आजवर अनेक मालिका आणि चित्रपटांमध्ये काम केलंय. परंतु बी. आर. चोप्रा यांच्या ‘महाभारत’ या मालिकेतल्या कर्णाच्या भूमिकेनं त्यांना विशेष लोकप्रियता मिळवून दिली. शिवाय ‘चंद्रकांता’मधील त्यांच्या शिवदत्तच्या भूमिकेवरही प्रेक्षकांनी भरभरून प्रेमाचा वर्षाव केला. ‘बढो बहू’, ‘युग’, ‘द ग्रेट मराठा’, ‘अजूनी’ यांसारख्या मालिकांमध्ये त्यांनी काम केलंय. याशिवाय ‘सोल्जर’, ‘तुमको ना भूल पाएंगे’, ‘रिश्ते’, ‘अंदाज’, ‘सडक’ आणि ‘बादशाह’सारख्या चित्रपटांमध्येही त्यांनी काम केलं होतं.

पंकज धीर यांचा मुलगा निकितन धीर हा देखील एक लोकप्रिय बॉलीवूड अभिनेता आहे. त्याने अनेक चित्रपटांमध्ये काम केलं आहे. निकितनच्या ‘जोधा अकबर’ आणि ‘चेन्नई एक्सप्रेस’ मधील त्याच्या भूमिकांसाठी विशेष ओळखला जातो.