अपंग व्यक्तींच्या सक्षमीकरणासाठी कोकण संस्थेचा जागतिक पांढरी काठी दिन साजरा

मुंबई : दरवर्षी १५ ऑक्टोबरला जागतिक पांढरी काठी दिन हा अपंग लोकांसाठी सुलभता आणि समावेशनाला प्रोत्साहन देण्यासाठी आणि अंधांसाठीच्या आचार नियमांबद्दल जनजागृती वाढवण्यासाठी साजरा केला जातो. कोकण संस्थेच्या वतीने दृष्टिहीन लोकांसाठी पांढरी काठी देऊन स्वातंत्र्य आणि गतिशीलता देण्यासाठी आणि त्यांचा आत्मविश्वास वाढावा यासाठी ११ ऑक्टोबर रोजी हा दिन साजरा केला. त्यानुसार हेतूने ६० दृष्टिहीन व्यक्तींना पांढरी काठी भेट म्हणून देण्यात आली.

‘पांढरी काठी’ ही अंधत्वाची खूण नसून आत्मनिर्भरतेचं प्रतीक आहे, असा संदेश यातून दिला जातो. ही काठी अंध व्यक्तींना नवा आत्मविश्वास देऊन समाजात समानतेने वावरण्याची ताकद देते आणि अंधत्व ही मर्यादा नसून योग्य साधनं मिळाल्यास तेही स्वावलंबीपणे जगू शकतात हा सकारात्मक दृष्टिकोन दृढ करते. अंध व्यक्तीना मुक्तपणे फिरण्यास आणि दैनंदिन कामे पूर्ण करण्यास या काठीने मदत व्हावी हा उद्देश डोळ्यासमोर ठेवून हा उपक्रम राबत असल्याचे कोकण संस्थेचे अध्यक्ष दयानंद कुबल यांनी सांगितले. या कार्यक्रमात प्रमुख पाहुणे म्हणून सैनिक पतसंस्थेचे मुख्य कार्यकारी अधिकारी तथा सिंधुदुर्ग पतसंस्था फेडरेशनचे अध्यक्ष सुनील राऊळ, अ‍ॅड.सिद्धार्थ भांबुरे, सामाजिक कार्यकर्ते रवी जाधव, रूपा मुद्राळे, प्रोफेसर रुपेश पाटील, र् साईकृपा अपंग बहुउद्देशीय शिक्षण संस्था, अनिल शिंगाडे, प्रकाश वाघ, ऑन कॉल रक्तदातेचे सचिव गवंडी, कोकण संस्थेचे रिजनल मॅनेजर प्रथमेश सावंत, साबाजी परब आदी मान्यवर उपस्थित होते.