"क्षमता असूनही उमेशला मराठी चित्रपटांत फार संधी मिळत नाही", प्रिया बापटने व्यक्त केली खंत

 

 

 

 

मुंबई : मराठी मनोरंजनविश्वातील अनेक लोकप्रिय जोड्यांपैकी एक जोडी म्हणजे प्रिया बापट आणि उमेश कामत. दोघांनी एकत्र अनेक चित्रपट, मालिका, नाटकांमध्ये कामं केली आहेत. तसेच, वैयक्तिकरित्या उमेश प्रिया सातत्याने मराठी, हिंदी मनोरंनविश्वात कार्यरत आहेत. अलिकडेच प्रिया बऱ्याच हिंदी चित्रपट, वेबसीरिजमध्ये विविधांगी भूमिका साकारताना दिसली. मराठीत बराच काळ काम करताना का दिसली नाही यावर बोलताना तिने का मुलाखतीत म्हटलं होतं की, २०१८ नंतर मराठी चित्रपटाची ऑफरच आली नाही. याच मुद्द्याला धरुन आता तिने उमेश कामत यालाही मराठी चित्रपटांमध्ये फारशी संधी मिळत नसल्याची खंत व्यक्त केली आहे.

 

प्रिया बापटने नुकतीच अमोल परचुरेंच्या 'कॅचअप' युट्यूब चॅनलला दिलेल्या मुलाखतीत म्हटले की, "मी आणि उमेश या विषयावर खूप बोलतो. उमेशचा आतापर्यंतचा प्रवास मी पाहिला आहे. मला प्रामाणिकपणे असं वाटतं की त्याला नाटक आणि मालिकेत जितक्या विश्वासार्हतेने पात्र दिली गेली आहेत तितक्या विश्वासाने सिनेमात दिली गेली नाहीत. याचं कारण मला कधीच कळलं नाही. आता हे बोललं पाहिजे की नाही माहित नाही पण मला कायम असं वाटतं की तो मराठी चित्रपटातला सर्वात अंडररेटेड अभिनेता आहे. त्याने नाटकांमधून स्वत:साठी मोठा प्रेक्षकवर्ग कमावला आहे. मलाच काय तर इंडस्ट्रीत कोणालाही त्याच्या क्षमतेवर शंका नसेल. तो खूप ताकदीचा अभिनेता आहे पण का कोण जाणे तो सिनेमात अंडररेटेड आहे. त्याप्रकारचे चित्रपट त्याला ऑफरच झाले नाही. तशा भूमिका त्याला मिळाल्याच नाही. याबद्दल आम्ही खूप चर्चा करतो की असं का होतं."

 

प्रिया पुढे म्हणाली की, "मला वाटतं की हे माझ्याबाबतीत आहे पण त्याच्यासोबत हे का होतंय? हे खूप दुर्दैव आहे. जे मेकर्स आहेत त्यांना उमेशला घेऊन चित्रपट का करायचा नाही? आपण मराठी इंडस्ट्री म्हणून आत्मपरीक्षण करण्याची गरज आहे. नुसतं प्रेक्षक येत नाहीत असं म्हणून चालणार नाही. मराठी प्रेक्षकांना महाराष्ट्रात इतर भाषिक चित्रपटांचेही पर्याय आहेत. त्याच तोडीचा मराठी चित्रपट जर आला तर मराठी माणूस ते पाहायला जाईल. हेच प्रेक्षक नाटकाबाबतीत तसं करत नाहीत. साऊथमध्ये चित्रपट ही संस्कृती आहे. तसं मराठीत नाटक हा संस्कृतीचा भाग आहे. प्रेक्षक त्यासाठी येतो. ज्याप्रकारच्या संहिता आपण आजच्या काळात आणायला पाहिजे, सिनेमॅटिक भाषेत त्या सांगायला पाहिजे तसं आपण सांगत नाही हे माझं एक कलाकार आणि इंडस्ट्रीचा भाग म्हणून अत्यंत प्रामाणिक मत आहे. आपल्याकडे नाटक आणि मालिकांमधून आलेली बरीच लोक आहेत त्यामुळे सिनेमा सुद्धा अगदी नाट्यमय पद्धतीने सांगितला जातो. पण सिनेमा चित्रातून बघण्याची मजा आली पाहिजे. आपण प्रेक्षकांना काय दाखवतोय हे आधी तुम्ही स्वत:च पाहा. चित्रपट आपली संस्कृती आहे असं समजून आपल्याला सातत्याने लोकांना तसा कंटेंट द्यावा लागेल."

 

आत्तापर्यंत उमेश कामतने अलीबाबा आणि चाळीशीतले चोर, ये रे ये रे पैसा, धुरळा, टाईम प्लीज, लग्न पाहावे करुन, मायलेक, स्माईल प्लीज अशा अनेक चित्रपटांत विविधांगी भूमिका साकारल्या आहेत.