वीजनिर्मितीसाठी बांबू बायोमासचा वापर होणार
एनटीपीसीचा सोलापूर वीजनिर्मिती प्रकल्प कोळशामध्ये बांबू बायोमास मिसळणार
Total Views |
मुंबई,दि.८: प्रतिनिधी नॅशनल थर्मल पॉवर कॉर्पोरेशनचा सोलापूर प्रकल्प आता वीज निर्मितीसाठी कोळशामध्ये मिसळण्यासाठी बांबू बायोमास खरेदी करणार आहे. शाश्वत पुरवठा सुनिश्चित करण्यासाठी शेतकरी उत्पादक कंपन्यांसोबत पन्नास वर्षांसाठी प्रारंभिक करार केले जातील.
एनटीपीसीचे अध्यक्ष गुरदीप सिंग म्हणाले, पर्यावरण संवर्धनासाठी बायोमास-आधारित ऊर्जा प्रकल्प ही काळाची गरज आहे. सोलापूर एनटीपीसी प्लांटमध्ये दरवर्षी ४ दशलक्ष टन कोळशाचा वापर होतो. सुरुवातीला १०% बांबू बायोमास मिसळल्याने, आम्हाला वर्षाला अंदाजे ४,००,००० टन बायोमास लागेल. बांबूची उपलब्धता जसजशी वाढते तसतसे हे मिश्रण २०-३०% किंवा त्याहून अधिक वाढू शकते." यावेळी त्यांनी आश्वासन दिले की, एनटीपीसी बांबू बायोमास ताबडतोब खरेदी करण्यास आणि शेतकरी उत्पादक कंपन्यांशी दीर्घकालीन करार करण्यास तयार आहे. या उपक्रमाचा थेट फायदा सोलापूर, लातूर आणि धाराशिव जिल्ह्यातील बांबू उत्पादक शेतकऱ्यांना होणार आहे.
एनटीपीसी अध्यक्षांनी या अग्रगण्य प्रयत्नाचा तपशील एका बैठकीदरम्यान शेअर केला. या बैठकीला महाराष्ट्र इन्स्टिट्यूट फॉर ट्रान्सफॉर्मेशन (मित्रा) चे सीईओ प्रवीण सिंग परदेशी, मुख्यमंत्र्यांच्या पर्यावरण आणि शाश्वत विकास टास्क फोर्सचे कार्यकारी अध्यक्ष पाशा पटेल आणि एनटीपीसीचे उच्चपदस्थ अधिकारी उपस्थित होते. २६ डिसेंबर २०२४ रोजी महाराष्ट्राचे मुख्यमंत्री देवेंद्र फडणवीस यांनी एनटीपीसीचे चेअरमन गुरदीप सिंग यांना लिहिलेल्या पत्रानंतर धाराशिव, लातूर आणि सोलापूर जिल्ह्यातील शेतकऱ्यांसाठी धोरणे आखण्यासाठी आठवड्याभरात ही बैठक बोलावण्यात आली.
पाशा पटेल म्हणाले की, कालवे, रस्त्याच्या कडेला आणि शेतांजवळ मोठ्या प्रमाणात बांबूची लागवड होते आणि सोलापूर एनटीपीसी प्लांट अखेरीस बांबू बायोमासमध्ये पूर्णपणे बदलू शकतो, जो शेतकऱ्यांना आणि शाश्वत लागवड पद्धतींसाठी आधार ठरेल. यावेळी पाशा पटेल यांनी शेतकऱ्यांना अनुदानाचा लाभ घेण्याचे आवाहन केले, जसे की, मनरेगाद्वारे देण्यात येणारे प्रति हेक्टर ₹७.०४लाख याव्यतिरिक्त, त्यांनी १० हेक्टरपर्यंत बांबू लागवडीसाठी आशियाई विकास बँकेने अनुदान योजनांवर प्रकाश टाकला.
यावेळी महाराष्ट्र इन्स्टिट्यूट फॉर ट्रान्सफॉर्मेशन (मित्रा)चे सीईओ प्रवीणसिंह परदेशी यांनी आश्वासन दिले की, संस्था बांबू लागवडीसाठी आवश्यक सहकार्य करेल आणि FPCs ला पुढाकार घेण्यासाठी प्रोत्साहित करेल. बांबूच्या बायोमास गोळ्यांवर प्रक्रिया करण्यासाठी सीएसआर उपक्रमांद्वारे यंत्रसामग्री उपलब्ध करून देण्याच्या योजनांचाही त्यांनी उल्लेख केला. पूर्वी, विक्रीबाबत अनिश्चिततेमुळे शेतकरी बांबूची लागवड करण्यास कचरत होते. एनटीपीसीने ५० वर्षांच्या खरेदी कराराच्या आश्वासनामुळे, बांबू विक्रीचा प्रश्न आता सुटला आहे."