धक्कादायक! गावातल्याच एकानं केला सरपंच देशमुखांचा घात, दिली लोकेशनची टीप

बीड : (Santosh Deshmukh Murder Case Update) बीड जिल्ह्यात मस्साजोग येथील सरपंच संतोष देशमुख यांच्या हत्या प्रकरणात प्रमुख आरोपींसह देशमुखांचे लोकेशन देणाऱ्यालाही स्थानिक पोलिसांनी अटक केली आहे. देशमुख यांची ज्याने टीप दिली तो सिद्धार्थ सोनवणे त्यांच्या अंत्यविधीलाही हजर असल्याची माहिती समोर आली आहे.

 

केज तालुक्यातील मस्साजोग येथील सरपंच संतोष देशमुख हत्या प्रकरणातील फरार आरोपींपैकी प्रमुख सुदर्शन घुले आणि सुधीर सांगळे या दोघांनाही पोलिसांनी शुक्रवारी दि. ३ जानेवारी रात्री पुण्यातून ताब्यात घेतले आहे. तर या आरोपींना सरपंचाचे लोकेशनची माहिती पुरवणारा मस्साजोग गावातीलच सिद्धार्थ सोनवणे यालाही पोलिसांनी मुंबईतून अटक केल्याची माहिती आहे. मस्साजोग येथीलच रहिवाशी असणाऱ्या सिद्धार्थ सोनवणेच्या स्थानिक गुन्हे शाखा पोलिसांनी कल्याण (मुंबई) येथून एका उसाच्या गाडीवर काम करत असताना मुसक्या आवळल्या आहेत. त्यामुळे संतोष देशमुख हत्या प्रकरणाचा आता पूर्णपणे उलगडा होण्यास मदत होणार आहे.

 

दरम्यान संतोष देशमुख यांची हत्या झाल्यानंतर सिद्धार्थ सोनवणे हा गावातच होता. मयत देशमुखांच्या अंत्यविधीला देखील तो उपस्थित होता. स्थानिक गुन्हे शाखेचे पोलीस सुरुवातीला आरोपींचा तपास करत असताना त्यांनी आपले लक्ष गावातच केंद्रित केलेले होते. अपहरण करण्यापूर्वी कोणीतरी जवळचा व्यक्ती लोकेशनची माहिती देत असावा असा संशय पोलिसांना होता. लोकेशन देणाऱ्यांचा पोलीस शोध घेत असल्याची खबर मिळताच सिद्धार्थ सोनवणे गावातून फरार झाला. फरार झाल्यानंतर त्याच्या संदर्भातील गोपनीय माहिती स्थानिक गुन्हे शाखेच्या पोलिसांनी मिळवण्यास सुरुवात केली. त्यानंतर सिद्धार्थ हा देखील या गुन्ह्यात सहभागी असल्याची खात्री स्थानिक गुन्हे शाखा पोलिसांना पटली. त्यानंतर १५ दिवसांपासून त्याचा शोध सुरू होता.

 

सिद्धार्थ सोनवणे फरार झाल्यानंतर मुंबईत लपून बसला होता. त्याने या काळात वेगवेगळी पाच सिम कार्ड देखील वापरली होती. स्थानिक गुन्हे शाखा पोलिसांना त्याचे मुंबईतील लोकेशन मिळताच त्या ठिकाणी त्यांनी सापळा लावला. एका मोकळ्या पटांगणात उसाच्या गाड्यावर काम करत असतानाच पोलिसांनी त्याच्यावर झडप मारली. ही कामगिरी पोलीस अधीक्षक नवनीत काँवत, स्थानिक गुन्हे शाखेचे पोलिस निरीक्षक उस्मान शेख यांच्या मार्गदर्शनाखाली पीएसआय महेश विघ्ने, तुळशीराम जगताप, विकास वाघमारे, भागवत शेलार, गणेश मराडे, विक्की सुरवसे यांनी केली.