साध्वी ऋतंभरांच्या प्रमुख उपस्थितीत दुर्गा वाहिनी व मातृशक्तीचे 'मानवंदना संचलन'

मुंबई : पुण्यश्लोक अहिल्याबाई होळकर जयंतीच्या त्रिशताब्दी आणि राणी दुर्गावती जयंतीच्या पंचशताब्दीच्या निमित्ताने विश्व हिंदू परिषद अंतर्गत दुर्गा वाहिनी व मातृशक्तीच्या वतीने (कोकण प्रांत) 'मानवंदना संचलन' आयोजित करण्यात आले आहे. साध्वी ऋतंभरा ( Sadhvi rutambhara ) यांच्या प्रमुख उपस्थितीत रविवार, दि. ५ जानेवारी रोजी दुपारी ४ वाजता राजा शिवाजी विद्यालय, दादर येथे मुख्य कार्यक्रम संपन्न होईल. तत्पूर्वी दुपारी ३ वाजता तब्बल ३ हजार महिला व तरुणींच्या भव्य संचलनातून पुण्यश्लोक अहिल्याबाई होळकर व राणी दुर्गावती यांना मानवंदना देण्यात येईल.

आजच्या तरुणींनी सक्षम व्हावे आणि आपल्या वीरांगनांचे कार्य समाजापर्यंत पोहोचावे हा या कार्यक्रमामागचा मुख्य उद्देश आहे. शुक्रवार, दि. ३ जानेवारी रोजी घेण्यात आलेल्या पत्रकार परिषदेत याबाबत सविस्तर माहिती देण्यात आली. दरम्यान विश्व हिंदू परिषद कोकण प्रांत उपाध्यक्षा प्रिया सावंत, मातृशक्ति कोकण प्रांत संयोजिका मनिषा भोईर, दुर्गावाहिनी कोकण प्रांत संयोजिका स्वाती भोसले उपस्थित होत्या.