महाराष्ट्राची ही घौडदौड कायम राहील! अवघ्या ६ महिन्यात ९५ टक्के थेट परकीय गुंतवणूक

 

 

मुंबई : मुख्यमंत्री देवेंद्र फडणवीस यांच्या नेतृत्वात थेट परकीय गुंतवणूकीत महाराष्ट्राने पुन्हा एकदा पहिला क्रमांक पटकावला आहे. महाराष्ट्रात अवघ्या ६ महिन्यात वार्षिक सरासरीच्या ९५ टक्के थेट परकीय गुंतवणूक आली आहे. महाराष्ट्र आता थांबणार नाही असे म्हणत मुख्यमंत्र्यांनी आपल्या 'X' अकाऊंटवर पोस्ट करत संपूर्ण आकडेवारीच जाहीर केली आहे.

 

मुख्यमंत्री देवेंद्र फडणवीस आपल्या पोस्टमध्ये म्हणाले की, "आपला महाराष्ट्र सातत्याने परकीय गुंतवणूक (एफडीआय) आकर्षित करण्यात अग्रेसर आहे. आता २०२४-२५ या आर्थिक वर्षातील सप्टेंबरला संपलेल्या दुसर्‍या तिमाहीची आकडेवारी आली आहे. त्यात अवघ्या सहा महिन्यात १ लाख १३ हजार २३६ कोटी रुपये इतकी परकीय गुंतवणूक महाराष्ट्रात झाली आहे. गेल्या ४ वर्षांतील सरासरी पाहिली तर १ लाख १९ हजार ५५६ कोटी रुपये वार्षिक गुंतवणूक महाराष्ट्रात आली आहे. याचाच अर्थ संपूर्ण वर्षभराच्या ९४.७१ टक्के गुंतवणूक ही फक्त ६ महिन्यात आली आहे."

 

माझे सहकारी उपमुख्यमंत्री एकनाथ शिंदे, उपमुख्यमंत्री अजितदादा पवार आणि संपूर्ण मंत्रिमंडळाच्या नेतृत्त्वात आपल्या महाराष्ट्राची ही घौडदौड अशीच कायम राहील, अशी ग्वाही मुख्यमंत्री देवेंद्र फडणवीसांनी दिली.

 

 

२०२०-२१ : १,१९,७३४ कोटी

२०२१-२२ : १,१४,९६४ कोटी

२०२२-२३ : १,१८,४२२ कोटी

२०२३-२४ : १,२५,१०१ कोटी

२०२४-२५ (एप्रिल ते सप्टेंबर या ६ महिन्यात) : १,१३,२३६ कोटी