मुंबई, दि.२८ : प्रतिनिधी बहुतेकजण आयुष्यभराची कमाई घालून घर घेत असतात. या गुंतवणुकीत फसवणूक होऊ नये म्हणून महारेराने घरखरेदीदारांना कायदेशीररित्या सक्षम करणारे अनेक निर्णय घेतलेले आहेत. आता महारेराने घर खरेदीदारांसाठी, गुंतवणूकदारांसाठी काही महत्त्वाच्या मार्गदर्शक सूचना जारी केल्या आहेत. या सूचनांनुसार पुरेपूर काळजी घेतल्यास सुरक्षित व संरक्षित गुंतवणूक करणे शक्य होणार आहे.
गृहनिर्माण प्रकल्प महारेराकडे नोंदणीकृत असायला हवा, हे तर अत्यावश्यक आहेच. याशिवाय संबंधित प्रकल्पावर न्यायालयात काही खटले प्रलंबित आहेत का? असल्यास कुठली? त्याची सद्यस्थिती काय? एकूण तपशील काय? कुठला 'बोजा' या प्रकल्पावर आहे का? प्रकल्पाचे प्रारंभ प्रमाणपत्र किती मजल्यांसाठी आहे, संबंधित स्थानिक नियोजन प्राधिकरणाकडून दिल्या जाणाऱ्या प्रकल्प मंजुरीच्या आराखड्यात कशाकशाला मंजुरी दिलेली आहे या बाबींची घरखरेदीदाराने प्रत्यक्ष व्यवहारापूर्वी खात्री करून घेणे अत्यावश्यक आहे. महारेराने नवीन गृहनिर्माण प्रकल्पाची नोंदणी करताना हा सर्व तपशील पूरक कागदपत्रांसह देणे बंधनकारक केलेला आहे. त्यामुळे प्रकल्पाच्या महारेरा नोंदणीक्रमांकाच्या मदतीने महारेराच्या संकेतस्थळावर तो सर्वांसाठी उपलब्ध आहे. प्रकल्पात आश्वासित केलेल्या विविध सोयी, सुविधा कधी उपलब्ध होणार, सोसायटीला कधी हस्तांतरीत होणार हेही या जोडपत्रात नमूद करणे गरजेचे आहे.
याशिवाय तुम्ही एकूण रकमेपैकी १० टक्क्यांपर्यंत रक्कम देऊन घरखरेदी, घर नोंदणी करीत असल्यास प्रवर्तकाला घर विक्रीकरार करणे बंधनकारक आहे. करीत नसल्यास तुम्ही महारेराकडे तक्रार नोंदवू शकता. तसेच ज्यांच्यामार्फत हा व्यवहार करताय ते मध्यस्थ महारेरांकडे नोंदणीकृत असायलाच हवेत. म्हणून या सर्व बाबींचीही खात्री करून घ्यायला हवी. विहित कालावधीत, विहित प्रपत्रात प्रकल्पाबाबत सद्यस्थिती दर्शवणारे अनुपालन अहवाल सादर न करणाऱ्या आणि प्रकल्प व्यापगत झाला तरी सद्यस्थिती महारेरा संकेतस्थळावर अद्ययावत न करणाऱ्या प्रकल्पांची महारेरा नोंदणी स्थगित करण्यात येते. या प्रकल्पांची बँक खाती गोठवून त्यांचे एकूण व्यवहार थांबवण्यात येतात. या प्रकल्पांच्या याद्याही महारेरा संकेतस्थळावर दिलेल्या असतात. गुंतवणूकदारांनी या याद्याही बघून घ्यायला हव्या. भविष्यात उपस्थित होणाऱ्या अनेक शक्यतांबद्दल आधीच काळजी घेऊन महारेराने अनेक बाबी प्रवर्तकांना बंधनकारक केलेल्या आहेत. घरखरेदीदाराला कायदेशीर दृष्ट्या सक्षम करण्याचा प्रयत्न केलेला आहे. गरज आहे गुंतवणूकदारांनी सजगपणे या तरतुदींची पूर्तता प्रवर्तक करतात की नाही हे पाहण्याची. घर नोंदणीपूर्वी त्याची छाननी करण्याची. त्यासाठी आग्रह धरण्याची. त्यातूनच आपली गुंतवणूक सुरक्षित आणि संरक्षित राहायला मदत होणार आहे.
घरखरेदी सुरक्षित व संरक्षित राहावी म्हणून घरखरेदीदाराला कायदेशीरदृष्ट्या सक्षम करण्यासाठी महारेरा सातत्याने प्रयत्नशील आहे. घरखरेदीदारांनी प्रत्यक्ष गुंतवणूकीपूर्वी सजगपणे सर्व माहिती अभ्यासण्याची आणि या बाबींचा आग्रह धरण्याची आवश्यकता आहे.
- मनोज सौनिक अध्यक्ष, महारेरा