मुंबई महानगर प्रदेश विकास प्राधिकरणाचा सुवर्ण महोत्सव साजरा

मुंबईकरांच्या स्वप्नांना आकार देणारे विकासाचे माहेर : उपमुख्यमंत्री एकनाथ शिंदे

    24-Jan-2025
Total Views |

mmrda
मुंबई, दि. २४: प्रतिनिधी 'मुंबईकरांच्या स्वप्नांना आकार देणारे आणि विकासाचे माहेर असलेले मुंबई महानगर प्रदेश विकास प्राधिकरण म्हणजे राज्याचे ग्रोथ इंजिन असल्याचे प्रतिपादन उपमुख्यमंत्री एकनाथ शिंदे यांनी केले. वांद्रे कुर्ला संकुल येथील जिओ कन्व्हेशन सेंटर येथे ‘एम एम आर डी ए’ च्या ५० व्या वर्धापन दिनाच्या कार्यक्रमात ते बोलत होते.
कार्यक्रमास कौशल्य, रोजगार आणि उद्योजकता विकास मंत्री मंगलप्रभात लोढा, माहिती व तंत्रज्ञान मंत्री ॲड.आशिष शेलार, परिवहन मंत्री प्रताप सरनाईक, आमदार राजन नाईक, नगर विकास विभागाचे अपर मुख्य सचिव असीम गुप्ता, अतिरिक्त महानगर आयुक्त विक्रम कुमार, आश्विन मुद्गल, सह महानगर आयुक्त राधा विनोद शर्मा यांच्यासह ‘एम एम आर डी ए’ चे अधिकारी, कर्मचारी आणि नागरिक उपस्थित होते.
राज्यातील जनतेला मिळालेल्या सोयी सुविधांचा उत्सव म्हणजे आजचा उत्सव विकासाचा ही संकल्पना असल्याचे सांगून उपमुख्यमंत्री शिंदे म्हणाले की, 'वेगवान आणि गतिमान विकासाचे शिल्पकार असलेल्या ‘एम एम आर डी ए’ च्या टीमचे अभिनंदन करतो. मुंबई सह ठाणे, रायगड आणि पालघर जिल्ह्याच्या विकासात प्राधिकरणाचा मोठा वाटा आहे. साडेसहा हजार चौरस किलोमीटर क्षेत्रात आणि साडेतीन कोटी लोकसंख्या असलेल्या परिसराचा विकास प्राधिकरण करत आहे. सल्लागार म्हणून स्थापन झालेली ही संस्था आज वेगाने विकासकामे करत आहे.
पुढे उपमुख्यमंत्री शिंदे म्हणाले की, ३ लाख कोटी पेक्षा जास्त किमतीची कामे सुरू असणारे हे देशातील एकमेव प्राधिकरण आहे. राज्य आज थेट परकीय गुंतवणुकीच्या क्षेत्रात क्रमांक एकवर आहे. दावोस येथे आतापर्यंतच्या गुंतवणुकीचे सर्व रेकॉर्ड तोडले जातील असा विश्वास आहे. लोकांच्यासाठी शासन काम करत आहे. लोकांना सर्व सोयीसुविधा देणे यासाठी शासन काम करत आहे. मुंबईतील झोपडपट्टी पुनर्वसन प्रकल्प आता ‘एम एम आर डी ए’, महापालिका, सिडको, म्हाडा यांच्या माध्यमातून राबवण्याचा निर्णय घेतला आहे. त्यामुळे हे प्रकल्प लवकर पूर्ण होतील असा विश्वासही त्यांनी व्यक्त केला.