प्रजासत्ताक दिनाची शाळांची सार्वजनिक सुट्टी रद्द, महाराष्ट्र सरकारचा मोठा निर्णय!
Total Views |
मुंबई : (Republic Day) प्रजासत्ताक दिनानिमित्त दरवर्षी २६ जानेवारीला राज्यातील शाळांमध्ये सुट्टी दिली जाते. पण आता ही सुट्टी रद्द करण्याचा मोठा निर्णय महाराष्ट्र सरकारने घेतला आहे. विद्यार्थ्यांना सुट्टी देण्याऐवजी शाळा प्रशासनाने शाळेत देशभक्तीपर कार्यक्रमांचे आयोजन करावे आणि विद्यार्थ्यांमध्ये राष्ट्रप्रेमाची भावना निर्माण करावी, असे निर्देश शालेय शिक्षण विभागाने दिले आहेत. त्यामुळे यावर्षीपासून महाराष्ट्रातील शालेय विद्यार्थ्यांना प्रजासत्ताक दिनाची सुट्टी मिळणार नाही. तसेच याबाबत सरकारने परिपत्रकही प्रसिद्ध केले आहे.
२६ जानेवारी हा दिवस महाराष्ट्रासह संपूर्ण देशात प्रजासत्ताक दिन म्हणून साजरा केला जातो. या दिवशी देशात सर्वत्र शालेय विद्यार्थ्यांना सार्वजानिक सुट्टी दिली जाते. सकाळी शाळेत झेंडा वंदन झाल्यानंतर विद्यार्थ्यांना सुट्टी दिली जाते. मात्र, आता यापुढे शालेय विद्यार्थ्यांना ही सुट्टी मिळणार नाही. महाराष्ट्र सरकारने प्रजासत्ताक दिनाची सुट्टी रद्द करण्याचा निर्णय घेतला आहे. या दिवशी कोणते कार्यक्रम घ्यावेत, यासाठी आठ स्पर्धा आणि काही कार्यक्रमांची यादी शालेय शिक्षण विभागाकडून देण्यात आली आहे.
शालेय शिक्षण विभागाने जारी केलेल्या परिपत्रकात असे निर्देश देण्यात आले आहेत की, २६ जानेवारीला शाळांमध्ये विविध स्पर्धा आणि कार्यक्रम आयोजित करावेत, ज्यामध्ये विद्यार्थ्यांमध्ये राष्ट्रप्रेमाची भावना निर्माण केली जाईल. त्यामध्ये ध्वजारोहणानंतर नृत्य, चित्रकला, निबंध, प्रभातफेरी, वक्तृत्व स्पर्धा, कविता स्पर्धा आणि क्रीडा स्पर्धा आणि प्रदर्शन यांचा समावेश करण्यात आला आहे. हे सगळे कार्यक्रम देशभक्तीपर संकल्पनेवर आधारितच असावेत, असे पत्रकात म्हटले आहे. जिल्हा शिक्षणाधिकारी आणि शिक्षण निरीक्षकांना निर्देशाची अंमलबजावणी करावी लागणार आहे.