शेत वहिवाटीमध्ये वाहन वापरानुसार रस्ता मिळणार

मुंबई : “यांत्रिकीकरणामुळे सध्या शेत वहिवाटीमध्ये मोठ्या वाहनांचा वापर होत आहे. त्यामुळे वाहन प्रकारानुसार शेतजमीन वहिवाट रस्ता बनवण्याबाबत तहसीलदारांना निर्णय घेता यावा, यासाठी मार्गदर्शक सूचना निर्गमित करण्यात याव्या,” अशा सूचना महसूलमंत्री चंद्रशेखर बावनकुळे ( Chandrashekhar Bawankule ) यांनी गुरुवार, दि. १६ जानेवारी रोजी दिल्या.

शेतजमिनीच्या खरेदी-विक्रीच्या दस्तनोंदणीमध्ये शेतरस्त्याचा समावेश बंधनकारक करणे आणि शेतरस्त्यांच्या नोंदणी ७-१२ इतर हक्कात करण्याबाबत महसूलमंत्र्यांच्या दालनात बैठक झाली. वित्तनियोजन, कृषी, मदत व पुनर्वसन, विधी व न्याय आणि कामगार राज्यमंत्री आशिष जयस्वाल, आ. अभिमन्यू पवार, महसूल विभागाचे अतिरिक्त मुख्य सचिव राजेशकुमार, सहसचिव अजित देशमुख यावेळी उपस्थित होते.

महसूलमंत्री बावनकुळे म्हणाले, “शासनाने शेतरस्त्यांचे वर्गीकरण केले आहे. त्यानुसार जे रस्ते अस्तित्वात आहेत, त्यांना क्रमांक देण्यात यावे. शेतजमिनीमध्ये वहिवाट करण्यासाठी अस्तित्वात असलेले रस्ते काही ठिकाणी अरुंद आहेत, अशा ठिकाणी मोठी वाहने जाण्यास अडचण निर्माण होऊन तक्रारीही होतात. शेत वहिवाट रस्त्याची तक्रार सुनावणी तहसीलदार यांच्याकडे होते. त्यानंतर त्यावर थेट अपील उच्च न्यायालयात केले जाते. थेट अपील होण्यापूर्वी अतिरिक्त जिल्हाधिकारी किंवा जिल्हाधिकार्‍यांकडे अपील करता यावे, यासाठी एक पायरी मध्ये असणे आवश्यक असून त्यानुसार नियमात सुधारणा करण्यात याव्या,” अशा सूचनाही त्यांनी अधिकार्‍यांना दिल्या.