भारत-सिंगापूर सेमीकंडक्टर परिसंस्था भागीदारी; सेमीकंडक्टर कंपन्यांना पंतप्रधानांचे आमंत्रण

नवी दिल्ली :      पंतप्रधान नरेंद्र मोदी सिंगापूर दौऱ्यावर असून येथील सेमीकंडक्टर आणि इलेक्ट्रॉनिक्स क्षेत्रातील आघाडीची कंपनी एईएमला भेट दिली आहे. या भेटीत सिंगापूरचे पंतप्रधान लॉरेन्स वोंग यांच्यासमवेत दिलेल्या भेटीत जागतिक सेमीकंडक्टर मूल्य साखळीतील एईएम ची भूमिका, कार्य आणि भारतासाठीच्या योजना याबाबत माहिती देण्यात आली आहे.

देशात सेमीकंडक्टर उत्पादन व्यवस्था विकसित करण्याचे भारताचे प्रयत्न आणि या क्षेत्रातील सिंगापूरची ताकद लक्षात घेता उभय देशांनी द्विपक्षीय सहकार्य आणखी विस्तारण्याचा निर्णय घेतला आहे. भारत-सिंगापूर मंत्रिस्तरीय गोलमेज परिषदेच्या दुसऱ्या बैठकीदरम्यान द्विपक्षीय सहकार्य वाढवण्यासाठी एक आधारस्तंभ म्हणून सेमीकंडक्टर्सवर लक्ष केंद्रित करून प्रगत निर्मिती करण्यास सहमती झाली आहे.

भारत-सिंगापूर सेमीकंडक्टर परिसंस्था भागीदारीबाबत सामंजस्य करारही केला असून एईएम येथे दोन्ही पंतप्रधानांनी सिंगापूरमध्ये प्रशिक्षण घेत असलेले जागतिक कौशल्य केंद्रातील भारतीय प्रशिक्षणार्थी तसेच सीआयआय -एंटरप्राइझ सिंगापूर इंडिया रेडी टॅलेंट कार्यक्रम अंतर्गत भारताला भेट दिलेल्या सिंगापूरच्या इंटर्नशी आणि एईएम मध्ये काम करणाऱ्या भारतीय अभियंत्यांशी संवाद साधला आहे. या भेटीत सहभागी झाल्याबद्दल पंतप्रधान मोदी यांनी सिंगापूरचे पंतप्रधान वाँग यांचे आभार मानले.