अखेर शिल्पकार जयदीप आपटे पोलिसांच्या ताब्यात!

 

 

मुंबई : मालवणमधील छत्रपती शिवाजी महाराजांच्या पुतळा दुर्घटनेतील आरोपी शिल्पकार जयदीप आपटे याला बेड्या ठोकण्यात अखेर पोलिसांना यश आले आहे. बुधवारी रात्री कल्याणमधून पोलिसांनी त्याला ताब्यात घेतले असून त्याला आज कोर्टात हजर केलं जाण्याची शक्यता वर्तवण्यात येत आहे.

 

मालवणमधील राजकोट किल्ल्यावरील छत्रपती शिवाजी महाराजांचा पुतळा अवघ्या ८ महिन्यांत कोसळल्याने राज्यभर संतापाचे वातावरण आहे. दरम्यान, ही दुर्घटना घडल्यानंतर या प्रकरणातील आरोपी शिल्पकार जयदीप आपटे आणि बांधकाम सल्लागार चेतन पाटील फरार झाले होते.

 

त्यानंतर चेतन पाटीलला शुक्रवारी पोलिसांनी कोल्हापूरातून अटक केली. परंतू, जयदीप आपटे फरार झाला होता. पोलिसांनी जयदीप आपटेविरोधात लुकआऊट नोटीस जारी केली होती. तसेच त्याचा शोध घेण्यासाठी अनेक पथकेही तैनात करण्यात आली होती. अखेर आता त्याला अटक करण्यात पोलिसांना यश आले आहे.

 

जयदीप आपटे हा बुधवारी त्याच्या कुटुंबियांना भेटण्यासाठी कल्याणमधील राहत्या घरी आला होता. यावेळी तो पहाटे तोंडाला मास्क बांधून आला होता. दरम्यान, त्याच्या घराजवळच्या बाजारपेठ पोलिसांनी त्याला ताब्यात घेतले. जयदीप आपटेला आज कोर्टात हजर केले जाऊ शकते.