" पोलिसांच्या शौर्यावर संशय घेणारे..." शिवसेना खासदार नरेश म्हस्के यांची विरोधकांवर सडकून टीका

ते पुढे म्हणाले की, बदलापूर अत्याचारातल्या आरोपीने पोलिसाची रिव्हॉल्वर हातात घेऊन पोलिसांवरच गोळीबार केला. तीन पोलिस त्यात जखमी आहे. पोलिसांनी स्व संरक्षणासाठी गोळीबार केला आणि त्यात आरोपीचा मृत्यू झालाय. मात्र विरोधक कुठलीही माहिती न घेता या घटनेवर प्रतिक्रिया देत सुटले आहेत. एन्काऊंटर की हत्या असा प्रश्न उपस्थित करून पोलिसांच्या शौर्यावर संशय व्यक्त करणे दुर्दैवी असल्याचे खासदार म्हस्के म्हणाले. अत्याचाराच्या दुर्दैवी घटनेचे विरोधकांनी राजकारण केले. आंदोलनासाठी बाहेरुन ३० हून अधिक बसेसने माणसे आणली आणि बेंबीच्या देठापासून हेच विरोधक आरोपीला ताबडतोब फाशी द्या, आमच्या ताब्यात द्या असे ओरडत होते. मात्र याच नराधमाचा पोलिसांनी स्वसंरक्षणात केलेल्या गोळीबारात मृत्यू झाला असेल तर विरोधकांना त्याचा इतका पुळका का आलाय, असा खरमरीत सवाल खासदार म्हस्के यांनी केला.

 

आरोपी अक्षय शिंदे याने केलेल्या गोळीबारात जखमी झालेले एपीआय निलेश मोरे यांची ठाण्यातील ज्युपिटर हॉस्पिटल येथे शिवसेनेच्या शिष्टमंडळाने विचारपूस केली. जखमी पोलीसाबाबत विरोधकांना काही घेणं देणं नाही पण अक्षय शिंदे मारला गेला याचे त्यांना दुःख होतंय. विरोधकांच्या या दुटप्पी भूमिकेमुळे पोलिसांच्या मनोधैर्यावर परिणाम होण्याची शक्यता आहे. त्यामुळे पोलिसांचं मनोबल कायम रहावं, त्यांच्या पराक्रमाचं कौतुक व्हावं तसंच महाराष्ट्रातील जनता त्यांच्या पाठीशी आहे हे दाखविण्यासाठी ज्यूपिटर हॉस्पिटलमध्ये उपचार घेत असलेल्या पोलिसांची भेट घेतली, असे खासदार नरेश म्हस्के म्हणाले. यावेळी शिवसेना प्रवक्त्या डॉ. मनिषा कायंदे, प्रवक्त्या शीतल म्हात्रे आणि मा नगरसेविका नम्रता भोसले उपस्थित होत्या.

ठाण्यातील व्यापारी मनसुख हिरेन याची १०० कोटींच्या वसुली करता हत्या करणारा सचिन वाझे हा पोलिस अधिकारी संजय राऊत यांचा पीए होता. सचिन वाझेचे तोंडभरुन कौतुक करणारे तत्कालीन मुख्यमंत्री उद्धव ठाकरे हिरेन प्रकरणी विधान परिषदेत मूग गिळून बसले होते, अशी टीका खासदार म्हस्के यांनी केली. तेलंगाणातील बलात्कार प्रकरणात एनकाउंटर करणाऱ्या पोलिसांचे सामनात जाहीर कौतुक केले मात्र महाराष्ट्र पोलिसांच्या कामगिरीवर तुम्ही संशय व्यक्त करता, त्यांचे कौतुक करायला तुम्हाला लाज वाटते का, असा सवाल खासदार म्हस्के यांनी केला. केवळ खुर्चीसाठी आरोपीच्या मृत्यूचे गलिच्छ राजकारण करणाऱ्या विरोधकांना महाराष्ट्रातील जनता लाथ मारुन हाकलून देईल, असे त्यांनी सांगितले.