मराठा आणि कुणबी दरोडेखोर आहेत का? बच्चू कडूंचा प्रकाश आंबेडकरांना सवाल

 

 

हिंगोली : मराठा आणि कुणबी हे दरोडेखोर आहेत का? असा सवाल प्रहार जनशक्ती पक्षाचे नेते बच्चू कडू यांनी वंचित बहुजन आघाडीचे नेते प्रकाश आंबेडकरांना केला आहे. मराठा आणि कुणब्यांपासून सावध रहा, असं विधान प्रकाश आंबेडकरांनी केलं होतं. यावर बच्चू कडूंनी प्रतिक्रिया दिली.

 

बच्चू कडू म्हणाले की, "कुणबी, मराठ्यांपासून सावध राहा म्हणजे ते काही लुटारू किंवा दरोडेखोर आहेत का? हे प्रकाश आंबेडकरांनी सांगावं. कुठल्याही जातीवर अशाप्रकारचे वक्तव्य करणं योग्य नाही. बाबासाहेब आंबेडकरांनी घटनेमध्ये सगळ्यांना योग्य स्थान दिलं आहे. पण प्रकाश आंबेडकर जेव्हा असं बोलतात तेव्हा खूप दु:ख वाटतं. बाबासाहेब आंबेडकरांचे वंशज असल्याचे ते म्हणतात. त्यामुळे त्यांना काही बोललं तर बाबासाहेबांचा अपमान होईल म्हणून आम्ही सावध राहतो," असेही ते म्हणाले. यावर कळत नसेल तर बोलू नये, असं प्रत्युत्तर प्रकाश आंबेडकरांनी दिलं आहे.

 

 

 

"कुणबी मराठ्यांपासून सावध राहा. आताच्या सभागृहात १९० कुणबी-मराठा समाजाचे आमदार आहेत आणि फक्त १८ आमदार ओबीसीचे आहे. कुणबी स्वत:ला ओबीसी जरी म्हणत असला तरी सभागृहात तो मी मराठ्यांबरोबर आहे असंच म्हणतो. त्यामुळे त्यांच्यापासून सावध राहा," असं विधान प्रकाश आंबेडकरांनी केलं होतं.