भारत आर्थिक महासत्ता बनण्याच्या मार्गावर....; उपसभापतींचे मोठं विधान

मुंबई :       भारत आर्थिक महासत्ता बनण्याच्या मार्गावर आहे, असे प्रतिपादन राज्यसभेचे उपसभापती हरिवंश यांनी केले आहे. आर्थिक समृद्धी साधल्यास भारताचे भविष्य उज्ज्वल असेल.कामगार, उद्योग आणि उद्योग भारताची भविष्यातील दिशा ठरवतील असे देखील उपसभापती हरिवंश यावेळी म्हणाले. दरम्यान, महात्मा गांधी आंतरराष्ट्रीय हिंदी विश्‍वविद्यालयात आयोजित 'भावी जगात भारत' या विषयावर विशेष व्याख्यान देतांना ते बोलत होते.

दरम्यान, साहित्य विद्यापीठाच्या गालिब सभागृहात आयोजित व्याख्यानात कार्यक्रमाच्या अध्यक्षस्थानी कुलगुरू प्रो. कृष्णकुमार सिंह, कुलसचिव प्रो.आनन्‍द पाटील,शिक्षण विद्यापीठाचे अधिष्‍ठाता प्रो. गोपाल कृष्ण ठाकुर मंचावर उपस्थित होते. हरिवंश पुढे म्हणाले की, आर्थिकदृष्ट्या यशस्वी झाल्याशिवाय भविष्य नाही. हा एक अस्तित्वाचा प्रश्न आहे आणि पहिला मूलभूत विचार आहे.

ते पुढे म्हणाले, पंतप्रधान नरेंद्र मोदी यांनी २०४७ पर्यंत भारत विकसित करण्याचा संकल्प केला आहे. हा संकल्‍प पूर्ण करण्यासाठी आम्हाला १३.५ च्या आर्थिक विकास दराने पुढे जावे लागेल. यामुळे आपण केवळ आर्थिकदृष्ट्या समृद्ध होणार नाही, तर आपल्या सर्व समस्याही दूर होतील. कोविड आपत्तीचा सामना करण्यासाठी अवघ्या ९ महिन्यांत दोन लसी तयार केल्या. आमच्यात क्षमता आहे हे आम्ही दाखवून दिले आहे. अर्जुनच्या ध्येयाप्रमाणेच आपले ध्येय साध्य करण्याची आपली दृष्टी असली पाहिजे. एकत्र काम करून आपण नवा भारत घडवू शकतो, असा विश्वास त्यांनी व्यक्त केला आहे.