फक्त तीन नाही सात कडव्यांची आहे 'सुखकर्ता दु:खहर्ता' आरती! संपूर्ण आरती एकदा वाचाच

मुंबई - 'सुखकर्ता दु:खहर्ता' ही समर्थ रामदास स्वामी लिखित आरती आपण दरवर्षी म्हणतो. या आरतीची आपण तीनच कडवी म्हणून पण रामदासस्वामींनी लिहिलेली ही आरती मुळात ७ कडव्यांची आहे. लेखक अभिराम भडकमकर लिखित आणि नीलेश अरुण कुंजीर दिग्दर्शित 'रघुवीर' या रामदास स्वामींच्या जीवनावर आधारित चित्रपटात ही आरती गीत स्वरूपात आली आहे. गायक चारुदत्त आफले यांनी ही आरती गायली आहे आणि गीतकार अजित परब यांनी ही संगीतबद्ध केली आहे. रामदास स्वामी लिखित या चित्रपटात गायली गेलेली ही आरती पुढीलप्रमाणे आहे.

 

सुखकर्ता दुःखहर्ता वार्ता विघ्नाची ।

नुरवी पुरवी प्रेम कृपा जयाची ॥

सर्वांगी सुंदर उटि शेंदुराची ।

कंठी झळके माळ मुक्ताफळांची ॥१॥

 

जय देव जय देव जय मंगलमूर्ती ।

दर्शनमात्रे मनकामना पुरती ॥ध्रु०॥

 

रत्नखचित फरा तुज गौरीकुमरा ।

चंदनाची उटी कुंकुमकेशरा ॥

हिरेजडीत मुकुुट शोभतो बरा ।

रुणझुणती नूपरें चरणीं घागरिया ॥ जय० ॥२॥

 

माथा मुकुट मणी कानी कुंडले ।

सोंड दोंदावरी शेंदुर चर्चिले ।।

नागबंद सोंड-दोंद मिराविले ।

विश्वरूप तया मोरयाचे देखिले ॥ जय० ॥३॥

 

चतुर्भुज गणराज बाही बाहुटे ।

खाजयाचे लाडू करुनी गोमटे ।।

सुवर्णाचे ताटी शर्करा घृत ।

अर्पी तो गणराज विघ्ने वारीतो ॥ जय० ॥४॥

 

छत्रे चामरे तुजला मिरविती ।

उंदीराचे वाहन तुजला गणपती ।।

ऐसा तु कलीयुगी सकळीक पाहसी ।

आनंदे भक्तासी प्रसन्न होसी ॥ जय० ॥५॥

 

ता ता धि मि किट धि मि किट नाचे गणपती ।

ईश्वर पार्वती कौतुक पाहती ।।

ताल मृदंग वीणा घोर उमटती ।

त्यांचे छंदे करुनी नाचे गणपती ॥ जय० ॥६॥

 

लंबोदर पीतांबर फणिवरबंधना ।

सरळ सोंड वक्रतुंड त्रिनयना ॥

दास रामाचा वाट पाहे सदना ।

संकटीं पावावें निर्वाणीं रक्षावें सुरवर वंदना॥ जय ० ॥ ७ ॥

 

जय देव जय देव जय मंगलमूर्ती ।

दर्शनमात्रे मनकामना पुरती