संजय राऊत आणि अनिल देशमुखांची कुख्यात गुंडासोबत पार्टी; नितेश राणेंचा गौप्यस्फोट

मुंबई :    नागपूरमधील कुख्यात गुंड गौतम भटकर याच्यासोबत खासदार संजय राऊत आणि माजी गृहमंत्री अनिल देशमुख यांनी पार्टी झाडल्याचा गौप्यस्फोट भाजपचे आमदार नितेश राणे यांनी केला आहे. त्यासंदर्भातील फोटोपुरावे त्यांनी सोशल मीडियावर सादर केले आहेत.

भटकर हा कुख्यात गुंड असून, तो गँगस्टर संतोष आंबेकर याचा साथीदार आहे. २०१६ मध्ये गँगस्टर संतोष आंबेकर, गौतम भटकर आणि त्याच्या टोळीविरुद्ध मोक्कांतर्गत कारवाई करण्यात आली होती. मोक्का प्रकरणात तो अनेक दिवस फरार होता. त्यानंतर तो न्यायालयात शरण आला होता. या पार्टीविषयी माहिती देताना नितेश राणे म्हणाले, "हे आहेत राज्याचे माजी गृहमंत्री अनिल देशमुख आणि महाराष्ट्राचा भोंगा संज्या. दोघेही बेलवर बाहेर आहेत. नागपुरात जेवणाचा आनंद घेत आहेत. हरकत नाही. पण बेलवरचे हे दोन्ही आरोपी कुणासोबत जेवतात तेही पहा. गौतम भटकरसोबत, असा हल्लाबोल नितेश राणेंनी केला आहे.