अमिताभ बच्चन यांच्यामुळे दिग्दर्शकाच्या आईने मारलेली कानशिलात
Total Views |
मुंबई : हिंदी चित्रपटसृष्टीतील महानायक अमिताभ बच्चन यांच्यामुळे कुणाला मार खावा लागला असेल यावर तुमचा विश्वास बसतो का? नाही ना. पण खरंच असं घडलं होतं. '12th फेल' या चित्रपटाचे दिग्दर्शक विधू विनोद चोप्रा यांनी एकदा अमिताभ बच्चन यांना ४ कोटी रुपयांची रोल्स रॉयस भेट दिली होती. आणि त्यानंतर काय घडलं होतं याचा किस्सा त्यांनी शेअर केला आहे.
२००७ साली विधू विनोद चोप्रा यांनी अमिताभ बच्चन यांच्यासोबत 'एकलव्य: द रॉयल गार्ड' या चित्रपटात काम केले होते. कमी बजेटमुळे त्यांनी अमिताभ बच्चन यांच्यासाठी ६५ हजार रुपयांची रुम बुक करण्यास नकार दिला होता, परंतु नंतर त्यांना चक्क ४ कोटी रुपयांची लक्झरी कार भेट दिली.
विधू विनोद चोप्रा यांनी एका मुलाखतीत सांगितले की, “मी अमिताभ यांच्यासाठी रूम बुक करू शकलो असतो, पण नंतर मी इतर स्टार्स म्हणजे सैफ अली खान आणि संजय दत्त यांना काही देऊ शकलो नसतो. मला त्यांच्यासाठीही रुम बुक कराव्या लागतात आणि त्यामुळे चित्रपटाला बजेटपेक्षा जास्त खर्च होतो. मग मला 'एकलव्य'सारखा चित्रपट कधीच करता आला नसता. अशावेळी तुम्ही एक वाईट चित्रपट बनवू शकता जो सर्वत्र चालेल. दरम्यान, 'एकलव्य' बॉक्स ऑफिसवर फ्लॉप ठरला असला तरी समीक्षकांनी त्याचे चांगलेच कौतुक केले. इतकंच नाही तर हा चित्रपट भारताकडून त्या वर्षीही ऑस्करसाठी पाठवण्यात आला होता.
पुढे ते म्हणाले की, “अमिताभ बच्चन यांना ४ कोटी रुपयांची रोल्स रॉयस गिफ्ट केल्यामुळे माझ्या आईने मला कानाखाली मारली होती, कारण तेव्हा मी स्वतः मारुती चालवत होतो. मी ती घटना कधीच विसरणार नाही. मी अमिताभ यांना कार गिफ्ट करत असताना माझ्या आईला घेऊन गेलो होतो. तिने अमिताभ यांना चावी दिली आणि परत येऊन माझ्या गाडीत बसली. ती बिग बींना 'लंबू' म्हणत. त्यावेळी माझ्याकडे ड्रायव्हर नव्हता, म्हणून मीच गाडी चालवत होतो. आई मला म्हणाली, 'तू लंबूला गाडी दिली? मी म्हणालो, हो, मग तिने विचारले, 'तू स्वतः गाडी का घेत नाहीस?' मी म्हटलं की घेईन, अजून वेळ आहे. त्यानंतर तिने गाडीची किंमत विचारली आणि स्वत:च म्हणाली ११ लाखांची तर असेलच. मी मोठमोठ्याने हसलो कारण आईला माहित नव्हते की कार ४ कोटी रुपयांची आहे”. त्यानंतर जेव्हा विधू विनोद चोप्रांनी आईला कारची किंमत सांगीलती त्यांनी त्यांच्या कानशिलात लगावली आणि मूर्ख म्हटले”.