लेप्टोस्पायरोसिस, डेंग्यू रुग्णांसाठी ठाण्यात अद्ययावत कक्ष !

 

ठाणे :ठाणे जिल्ह्याला पावसाने झोडपून काढल्याने साथजन्य आजारांचा धोका वाढण्याची भिती व्यक्त होत आहे. सध्या लेप्टोस्पायरोसिस, डेंग्यूसारख्या रुग्णांची संख्या बघता रुग्णांना चागले उपचार मिळावेत यासाठी ठाणे सिव्हील रुग्णालयात विशेष खबरदारी घेतली आहे. साथीच्या आजारांनी ग्रस्त रुग्णांसाठी विशेष अद्ययावत कक्ष स्थापन केला आहे.औषध साठा,आपत्कालीन पॅरा मेडिकल टीम सज्ज ठेवण्यात आली आहे. जुलै महिन्याच्या अखेरच्या सत्रात पावसाने चांगलाच धुमाकुळ घातला असुन यामुळे विविध भागात साथीचा आजार वाढत आहे. यामध्ये लॅप्टोस्पयरोसीस, डेंग्यू, मलेरियाचा प्रादुर्भाव वाढताना दिसत आहे.

 

ठाणे जिल्ह्यात साथीच्या आजारांची चिंता व्यक्त केली जाते. सरकारकडून साथीचे रोग पसरणार नाही यासाठी खबरदारी घेतली जात असून, जिल्हा आरोग्य प्रशासनाने डेंग्यू, मलेरिया, लेप्टोस्पयरोसिस अशा साथजन्य रुग्णांच्या उपचारासाठी उत्तम सुविधा सिव्हील रुग्णालयात केली असुन पावसाळयात उदभवणाऱ्या तापजन्य आजाराबरोबर कावीळ, गॅस्ट्रोग्रस्त रुग्णांना चांगले उपचार मिळावेत यासाठी अद्ययावत कक्ष उभारला आहे. कक्षात उपचारांसाठी लागणारी सर्व सामुग्री सज्ज ठेवण्यात आली आहे. अशी माहिती जिल्हा शल्यचिकित्सक डॉ. कैलास पवार यांनी दिली.

 

लेप्टोस्पायरोसिस आणि डेंग्यूची लक्षणे मोठ्या प्रमाणात बदलू शकतात, ज्यामध्ये फ्लूसारखी सौम्य लक्षणे ते गंभीर आजारापर्यंत आहेत. सामान्य लक्षणांमध्ये उच्च ताप, डोकेदुखी, स्नायू दुखणे, थंडी वाजून येणे, उलट्या होणे, कावीळ (त्वचा आणि डोळे पिवळे होणे) आणि डोळे लाल होणे यांचा समावेश होतो

 

पावसाळ्यात साचून राहिलेल्या पाण्यामुळे डासांची उत्पत्ती होऊन यामध्ये डेंग्यूचा धोका वाढतो. तर उंदराच्या मलमुत्रा पासून लेप्टोस्पायरोसिस धोका वाढतो. त्यामुळे पावसाळ्यात जास्त दिवस पाणी साचून देऊ नका, तर बाहेर जाताना पायात बुट घालावे, तुंबलेल्या पाण्यातून घरी आल्यावर साबणाने स्वच्छ हातपाय धुवावे. कुठे जखम झाली असल्यास ती भिजणार नाही, याची काळजी घ्यावी. पाणी उकळून प्यावे अशा काही गोष्टींची काळजी या दिवसात घेणे गरजेचे आहे.

- डॉ. कैलास पवार (जिल्हा शल्यचिकित्सक, सिव्हिल रुग्णालय)