वंदे भारत एक्सप्रेसचा वेग मंदावला

मुंबई, दि.८: प्रतिनिधी वंदे भारत एक्सप्रेसचा वेग निम्म्यावर आला आहे, देशातील सेमी-हाय स्पीड ट्रेन वंदे भारत एक्सप्रेसचा वेग कमालीचा कमी झाला आहे. वंदे भारत एक्स्प्रेसचा सरासरी वेग २०२०-२१ मध्ये ८४.४८ किमी प्रति तास होता तो २०२३-२४ मध्ये ७६.२५ किमी प्रति तास झाला आहे. माहिती अधिकार कायद्याअंतर्गत (आरटीआय) एका अर्जाला उत्तर देताना रेल्वे मंत्रालयाने ही माहिती दिली आहे.

अनेक ठिकाणी पायाभूत सुविधा वाढविण्याचे मोठे काम सुरू असल्याचे रेल्वे अधिकाऱ्यांनी सांगितले. त्यामुळे केवळ वंदे भारतच नाही तर इतर अनेक गाड्या धीम्या गतीने धावत आहेत. याशिवाय काही वंदे भारत गाड्याही दुर्गम भागात चालवण्यात आल्या आहेत. या भागात भौगोलिक कारणांमुळे किंवा खराब हवामानामुळे गाड्या जास्त वेगाने धावत नाहीत. मुंबई सीएसएमटी आणि मडगाव दरम्यान धावणाऱ्या वंदे भारत गाड्या कोकण रेल्वेच्या कमी उंचीच्या पर्वत रांगांमधून जातात. येथे वाढत्या वेगामुळे सुरक्षेचा प्रश्न निर्माण होतो. पावसाळ्यात गाड्या चालवणे अधिक आव्हानात्मक आहे, असे रेल्वेचे म्हणणे आहे.

आरटीआयमध्ये देण्यात आलेल्या माहितीनुसार, २०२०-२१ मध्ये वंदे भारत गाड्यांचा सरासरी वेग ८४.४८ किमी प्रति तास होता. २०२२-२३ मध्ये हा वेग ८१.३८ किमी प्रति तासावर आला आहे. २०२३-२०२४ मध्ये त्याचा वेग आणखी कमी होऊन ७६.२५ किमी प्रति तास झाला. १५ फेब्रुवारी २०१९ रोजी लाँच झालेली वंदे भारत ही सेमी-हाय स्पीड ट्रेन आहे. ती ताशी १६० किमी वेगाने धावू शकते. तथापि, खराब ट्रॅक स्थितीमुळे, ते दिल्ली-आग्रा मार्ग वगळता देशात कुठेही १३० किलोमीटर प्रति तासापेक्षा जास्त वेगाने धावू शकत नाही.

रेल्वेच्या अधिकाऱ्यानी दिलेल्या माहितीनुसार, रुळांची डागडुजी व दुरुस्ती करण्यात येत आहे. त्यामुळे ठिकठिकाणी खबरदारी घेण्यात येत आहे. काम पूर्ण झाल्यानंतर, आमच्याकडे अशा गाड्या असतील ज्या ताशी २५० किलोमीटर वेगाने धावतील.