मेट्रो २ अ आणि ७ मार्गिकेवरुन एका दिवसात २ लाख प्रवाशांचा प्रवास

 मुंबई, दि.८ : प्रतिनिधी मुंबईतील मेट्रो मार्गिका २ए आणि ७ वर एकाच दिवसात २ लाख ६० हजार ४७१ प्रवाशांनी मेट्रोने प्रवास करत एका दिवसांतील प्रवासी संख्येचा उच्चांक गाठला आहे. हे जाहीर करताना आम्हाला आनंद होत आहे, अशी माहिती महामुंबई मेट्रो संचलन महामंडळाकडून देण्यात आली आहे.

मुंबई महानगर प्रदेश विकास प्राधिकरणाकडून (एमएमआरडीए) मेट्रो २ अ आणि ७ मार्गिकेतील दहिसर ते डहाणुकरवाडी-आरे असा २० किमीचा पहिला टप्पा एप्रिल २०२२ मध्ये सेवेत दाखल करण्यात आला आहे. तर जानेवारी २०२३ मध्ये दुसरा टप्पा सेवेत दाखल झाला आणि दहिसर ते अंधेरी पश्चिम अशी मेट्रो २ अ आणि दहिसर ते गुंदवली अशी मेट्रो ७ मार्गिका कार्यान्वित झाली. दरम्यान मेट्रो २ अ आणि ७ चा पहिला टप्पा सेवेत दाखल झाल्या.

त्या दिवशी अर्थात पहिल्या दिवशी या मार्गिकेवरुन ५५ हजार प्रवाशांनी प्रवास केला होता. तर पहिला टप्पा सेवेत दाखल झाल्यानंतर पहिल्या पाच महिन्यात म्हणजेच सप्टेंबर २०२२ मध्ये एकूण प्रवाशी संख्या ५० लाखांच्या घरात गेली होती. कालांतराने या पहिल्या टप्प्याला प्रतिसाद वाढत गेला आणि जेव्हा पूर्ण क्षमतेने अर्थात दहिसर ते अंधेरी पश्चिम (मेट्रो २ अ) आणि दहिसर ते गुंदवली (मेट्रो ७) या दोन्ही मार्गिका धावू लागल्या त्यावेळी प्रवाशी संख्येत लक्षणीय वाढ होण्यास सुरुवात झाल्याची माहिती महामुंबई मेट्रो संचलन महामंडळाकडून (एमएमएमओसीएल) देण्यात आली आहे.

एमएमएमओसीएलवर या दोन्ही मार्गिकेच्या संचलन आणि देखभालीची जबाबदारी आहे. एप्रिल २०२२ ते २०२४ दरम्यान दहा कोटी प्रवाशांनी मेट्रो २ अ आणि ७ वरुन प्रवास केला आहे. यावर एमएमआरडीए आणि एमएमएमओसीएलने समाधान व्यक्त केले आहे. दिवसाला दोन लाख ३० हजार ते दोन लाख ४० हजार प्रवाशी या मार्गिकेवरुन प्रवास करताना दिसत आहेत. प्रवास करणाऱ्या प्रवाशांचा अनुभव अधिक सुखकर आणि सुरक्षित व्हावा, यासाठी महा मुंबई मेट्रो सातत्याने प्रयत्नशील आहे. आणि मुंबईकर प्रवासीही मेट्रोने प्रवास करणं पसंत करीत आहेत. यात आणखी वाढ कशी होईल यादृष्टीने प्रयत्न केले जाणार असल्याचे एमएमएमओसीएलकडून सांगण्यात येत आहे.