रविंद्र वायकरांच्या विजयामागे टपाली मते ठरली निर्णायक!

उत्तर पश्चिम मतदारसंघातील निकालाबाबत उलटसूलट चर्चा सुरू झाल्यानंतर निवडणूक निर्णय अधिकाऱ्यांनी बुधवार, दि. ५ जून रोजी यासंदर्भात स्पष्टीकरण दिले. त्यानुसार, या मतदारसंघात ईव्हिएममधील मतमोजणीच्या २६ फेऱ्या झाल्या. अंतिम फेरीत अमोल कीर्तिकर हे एका मताने आघाडीवर होते. ईव्हिएममधील मतांची मोजणी संपल्यानंतर टपाली मतपत्रिकांच्या फेरीचा निकाल जाहीर करण्यात आला. त्यात कीर्तीकर यांना १ हजार ५०१, तर रवींद्र वायकर यांना १ हजार ५५० मते प्राप्त होती. नियमाप्रमाणे टपाली मतपत्रिकांची संख्या 'ईव्हीएम' मतमोजणीच्या सर्व फेऱ्यानंतर जाहीर केली जाते. त्यानुसार, वायकर हे ४८ मतांनी आघाडीवर राहिले.

टपाली मतांचा कौल समोर आल्यानंतर निवडणूक निर्णय अधिकाऱ्यांनी रवींद्र वायकर यांच्या विजयाची घोषणा सायंकाळी ७.५३ वाजता केली. त्यावर, कीर्तीकर यांच्या प्रतिनिधींनी ८.०६ वाजता पुनर्मतमोजणीचे लेखी पत्र सादर केले. त्यांनी घेतलेली हरकत ही विहित मुदतीनंतर होती. त्यांनी कोणतीही मुद्देसूद हरकत घेतलेली नव्हती. तसेच संपूर्ण मतमोजणी प्रक्रिया तसेच 'व्हीव्हीपॅट' मोजणी दरम्यान कोणतीही हरकत घेण्यात आली नव्हती, असे मुंबई उत्तर पश्चिमच्या निवडणूक निर्णय अधिकाऱ्यांनी स्पष्ट केले.