छत्रपती शिवाजी महाराजांची प्रेरणा घेऊन ध्येयपथावर कार्यरत राहणार – पंतप्रधान नरेंद्र मोदी

गेल्या दहा वर्षात अनेक मोठे निर्णय घेतले असून पुढील कार्यकाळात भ्रष्टाचार आणि भ्रष्टाचाऱ्यांविरोधात कठोर कारवाई सुरूच राहणार आहे. यंदाचे वर्ष छत्रपती शिवाजी महाराजांच्या राज्याभिषेकाचे ३५० वे वर्ष आहे. त्यामुळे त्यांच्यापासून प्रेरणा घेऊन ध्येयपथावर वाटचाल सुरूच ठेवणार असल्याचे पंतप्रधान नरेंद्र मोदी म्हणाले.

विरोधी आघाडीच्या एकत्रित जागांची बेरीजही एकट्या भाजपएवढी नसल्याचे पंतप्रधानांनी अधोरेखित केले. ते पुढे म्हणाले, अरुणाचल प्रदेश, ओडिशा, आंध्र प्रदेश येथे काँग्रेसचे सुपडा साफ झाला आहे. ओडिशात भाजप प्रथमच स्वबळावर सरकार स्थापन करणार आहे, तर आंध्र प्रदेशात चंद्राबाबू नायडू यांच्या नेतृत्वाखाली रालोआचे सरकार स्थापन होणार आहे.

केरळमध्येही प्रथमच भाजपचा खासदार विजयी झाला असून तेथे भाजपच्या अनेक पिढ्यांचा संघर्ष आणि बलिदान यास फळ आले आहे. त्याचप्रमाणे तेलंगणात भाजपची संख्या दुप्पट झाली आहे. मध्य प्रदेश, गुजरात छत्तीसगढ, उत्तराखंड, हिमाचल प्रदेशात तर जवळपास क्लीन स्वीप दिला आहे. त्याचवेळी आंध्र प्रदेशात चंद्राबाबू तर बिहारमध्ये नितीश कुमार यांच्या साथीने चमकदार यश मिळवले आहे.