विद्यार्थ्यांना थेट शाळेत मिळणार ‘एसटी’ पास

 

मुंबई : शाळा-महाविद्यालयात शिक्षण घेणार्‍या लाखो विद्यार्थी-विद्यार्थिनींना आता ‘एसटी’चे पास हे थेट त्यांच्या शाळेत वितरित करण्यात येणार आहेत. तशा सूचना ‘एसटी’ महामंडळाचे उपाध्यक्ष व व्यवस्थापकीय संचालक डॉ. माधव कुसेकर यांनी स्थानिक ‘एसटी’ प्रशासनाला दिल्या आहेत. नवीन वर्षाच्या पहिल्या सत्रातील शाळा आता सुरू झालेल्या आहेत. घरापासून शाळेपर्यंत जाण्यासाठी शासनाने विद्यार्थ्यांना ‘एसटी’च्या माध्यमातून 66 टक्के इतकी सवलत दिली आहे.

 

म्हणजे केवळ 33 टक्के रक्कम भरून विद्यार्थ्यांना मासिक पास काढता येतो. त्याचप्रमाणे शासनाच्या ‘पुण्यश्लोक अहिल्याबाई होळकर योजने’अंतर्गत बारावीपर्यंत शिक्षण घेणार्‍या सर्व विद्यार्थिनींना मोफत ‘एसटी’ पासचे वितरण केले जाते. यासाठी विद्यार्थी-विद्यार्थिनींना ‘एसटी’च्या पास केंद्रावर जाऊन रांगेत उभे राहून पास घ्यावे लागत होते. किंवा गटागटाने आगारात जाऊन आगार व्यवस्थापनाकडून पास घेतले जात असत. पण यंदापासून विद्यार्थ्यांना पाससाठी रांगेत ताटकळत उभे राहावे लागणार नाही.

 

त्यांच्या शाळा-महाविद्यालयांनी पुरवलेल्या यादीनुसार ‘एसटी’च्या कर्मचार्‍यांकडून त्या विद्यार्थ्यांना आणि विद्यार्थिनींना त्यांचे ‘एसटी’ पास थेट शाळेत देण्यात येणार आहेत. या संदर्भात मंगळवार, दि. 18 जूनपासून ‘एसटी’ प्रशासनातर्फे ‘एसटी पास थेट तुमच्या शाळेत’ ही विशेष मोहीम राबविण्यात येत आहे. तत्पूर्वी सर्व शाळा महाविद्यालयाच्या मुख्याध्यापक व प्राचार्य यांना ‘एसटी’च्या आगार व्यवस्थापकांनी पत्र देऊन आपल्या शाळेत नवीन वर्षात शिकणार्‍या विद्यार्थ्यांची यादी तयार ठेवण्यास सांगितले आहे.