अजिंक्य आणि अश्विनी यांची जोडी २५ वर्षांनी पुन्हा एकत्र पडद्यावर झळकणार...

 

 

 

 

मुंबई : शाब्बास सूनबाई’,‘मायेची सावली’,‘चल गंमत करू’ असे एकेकाळी मराठी चित्रपट गाजवणारी सुपरहिट जोडी पुन्हा २५ वर्षांनंतर एकत्र दिसणार आहे. अभिनेत्री अश्विनी भावे आणि अभिनेते अजिंक्य देव घरत गणपती या चित्रपटाच्या निमित्ताने प्रेक्षकांचे मनोरंजन करण्यासाठी पुन्हा सज्ज झाले आहेत.

 

घरत गणपती या चित्रपटात अश्विनी आणि अजिंक्य शरद घरत आणि अहिल्या घरत या व्यक्तिरेखा ते साकारणार आहेत. या चित्रपटात अजिंक्य देव आपल्याला कुटुंबवत्सल पती, प्रेमळ वडिल अशा भूमिकेत दिसणार असून कुटुंबाच्या पाठीशी ठामपणे उभी राहणाऱ्या करारी आईची व्यक्तिरेखा अश्विनी भावे साकारणार आहेत.

 

यापुर्वी ‘शाब्बास सूनबाई’,‘मायेची सावली’,‘चल गंमत करू’, ‘सरकारनामा’ या चित्रपटांद्वारे आमच्यातली केमिस्ट्री पडद्यावर चांगलीच खुलली आता २५ वर्षांनी ‘घरत गणपती’ चित्रपटाच्या निमित्ताने एकत्र काम करण्याचा आनंद व्यक्त करीत, आमची केमिस्ट्री रसिकांना आनंद देईल, असं दोघेही सांगतात. श्री गणरायाच्या आगमनाच्या निमित्ताने घरत कुटुंबातल्या अनुबंधाची हलकी-फुलकी गोष्ट ‘घरत गणपती’ चित्रपटात पाहायला मिळणार आहे.

 

पॅनोरमा स्टुडिओज आणि नॅविअन्स स्टुडिओ यांच्या संयुक्त विद्यमाने ‘घरत गणपती’ हा भव्य चित्रपट २६ जुलैला आपल्या भेटीला येणार आहे. चित्रपटाचे दिग्दर्शन नवज्योत नरेंद्र बांदिवडेकर यांचे असून कुमार मंगत पाठक, अभिषेक पाठक, नम्रता बांदिवडेकर, नवज्योत नरेंद्र बांदिवडेकर, गौरी कालेलकर-चौधरी यांनी ‘घरत गणपती’ चित्रपटाची निर्मिती केली आहे.