ठाण्यातही होर्डिंगचा धोका...महामार्गालगतचा होर्डींग वाऱ्याने झुलतोय!

 

 

मुंबईतील घाटकोपर भागातील जाहिरात फलक कोसळून झालेल्या दुर्घटनेच्या पार्श्वभूमीवर ठाणे महापालिकेच्या जाहिरात विभागाने शहरातील १४ बेकायदा होर्डींग हटविण्याची कारवाई केली. याशिवाय, ठरवून दिलेल्या आकारांपेक्षा मोठ्या असलेल्या ३२ होर्डींगवरील लोखंडी पत्रे काढून टाकण्याची कारवाई करण्यात आली. त्याचबरोबर जाहिरात कंपन्यांनी २६० फलकांचे स्थैर्यता प्रमाणपत्र पालिकेकडे सादर केले आहेत. असे असले तरी कंपन्यांनी सादर केलेली प्रमाणपत्र योग्य आहेत की नाही, याची खातर करण्याची मागणी नागरिकांकडून होत होती. असे असतानाच, स्थैर्यता प्रमाणपत्र सादर केलेले एक होर्डींग वाऱ्याच्या वेगाने पडून अपघात होण्याची शक्यता निर्माण झाल्याचे मंगळवारच्या पावसादरम्यान दिसून आले.

मंगळवारी पावसाला सुरूवात झाल्यानंतर दुपारी वाऱ्यामुळे पूर्वद्रुतगती महामार्गाजवळील ग्लॅरी अल्वारिस परिसरात एक लोखंडी होर्डींग झुलताना आढळून आला. याबाबची माहिती परिसरातील नागरिकांनी पोलीस आणि महापालिकेच्या अधिकाऱ्यांना दिली. त्यानंतर ठाणे महापालिकेचे उपायुक्त दिनेश तायडे यांच्यासह इतर अधिकारी घटनास्थळी दाखल झाले. या जाहिरात फलकांचे स्थैर्यता प्रमाणपत्र संबंधित कंपनीकडे असल्याची माहिती महापालिका प्रशासनाने दिली. असे असले तरी खबरदारीचा उपाय म्हणून प्रशासनाने जाहिरात फलक आणि जागा मालकाला नोटीस बजावली आहे. सुरक्षिततेच्या दृष्टीकोनातून ठाणे महापालिकेने होर्डींग हटविण्याची सूचना केली आहे.