नारायण राणेंच्या प्रचारासाठी अमित शाह मैदानात!

 

 

सिंधुदुर्ग : राज्यात सध्या लोकसभा निवडणुकांचे वारे वाहत आहेत. महायूती आणि महाविकास आघाडीच्या उमेदवारांनी आपापल्या प्रचाराला सुरुवात केली आहे. यातच आता केंद्रीय मंत्री नारायण राणे यांच्या प्रचारासाठी केंद्रीय गृहमंत्री अमित शाह सभा घेणार आहेत.

 

महाराष्ट्रात पंतप्रधान नरेंद्र मोदी आणि उत्तर प्रदेशचे मुख्यमंत्री योगी आदित्यनाथ हे महायूतीच्या उमेदवारांसाठी सभा घेत आहेत. अशातच आता केंद्रीय मंत्री अमित शाह हेदेखील नारायण राणेंचा प्रचार करणार आहेत. शुक्रवार, ३ मे रोजी रत्नागिरी-सिंधुदुर्ग लोकसभा मतदारसंघात त्यांच्या सभेचे आयोजन करण्यात आले आहे.

 

 

या सभेसाठी महायूतीकडून जोरदार तयारी करण्यात आली असून रत्नागिरीतील जवाहर मैदानावर दुपारी १ वाजताच्या सुमारास ही सभा होणार असल्याचे सांगण्यात येत आहे. रत्नागिरी-सिंधुदुर्गमध्ये अमित शाह महायूतीचे उमेदवार नारायण राणे यांचा प्रचार करणार आहेत.

 

दुसरीकडे, महाविकास आघाडीने रत्नागिरी-सिंधुदुर्ग लोकसभा मतदारसंघात उबाठा गटाचे नेते आणि विद्यमान खासदार विनायक राऊत यांना उमेदवारी दिली आहे. त्यामुळे या लोकसभा मतदारसंघात नारायण राणे विरुद्ध उद्धव ठाकरे अशी थेट लढत पाहायला मिळणार आहे.